‘OKU fiema’u ‘e Tonga ha pa’anga Nu’usila ‘e NZ$73.6 miliona pe ko e pa’anga Tonga ‘e $108,865.309.16 ke fakapa’anga ‘aki ‘a e Sipoti ‘o e Pasifiki ‘i he 2019.

Ko e lipooti ‘eni kuo tukumai mei he kautaha fale’i ko e Beca International, kā ‘oku nau pehē ‘e ala a’u pe ‘a e fakamole ia ki he pa’anga Nu’usila ‘e NZ$100 miliona (TOP$149,084,163.30).

‘I he’ene pehē ‘oku lele ofi pe fakamole ki he Sipoti 2019, ‘i he fakamole ‘o e nō mei Siaina ki he langa ‘o Nuku’alofá. Kā, ‘oku ‘I ai ‘a e fale’I fefeka mei he ngaahi kautaha faapa’angá ke ‘oua ‘e toe fai ha nō ki he fakamole ko ‘ení, he kuo ‘osi fu’u tōtu’a ‘a e mo’ua ‘o e Pule’angá.

‘Oku pehē ‘e he kautaha fale’í ko ‘enau ‘esitimeti ki he fakamole ‘oku tonu, kā ‘e ala holo’aki ha peseti ‘e 15% pe ko e kake’aki ha peseti ‘e 40%, ‘a ia ‘oku nau pehē ‘oku ma’ulalo ‘a e me’a ia koee ‘oku nau ‘esitimeti mai.

Kapau ‘e ‘i ai ha kake mei he $NZ73.6 miliona ‘aki ha 40%, ko ‘ene a’u ia ki he NZ$100 miliona. ‘Oku lahi pe foki ‘a e ngaahi fakamole ia ‘oku kei nofo fufū ‘i he fa’ahinga poloseki langa lahi pehe ni.

Fakatatau ki he lipooti mei he Beca, ‘oku ‘ikai ke kau he ‘enau ‘esitimetí ‘a e ngaahi naunau hangē ko e sea mo e palepale pe teniti, kae’uma’ā ‘a e ngaahi naunau hangē ko e uasi ‘elekitulonika, papa tohi kai, pea pehē foki ki he ngaahi naunau fakale’olahi.

Ko e ngaahi naunau ko ‘ení ‘oku ala kole pe ke ngāue’aki pe ko ha lisi ki he Sipotí. Ko e fokotu’u ‘a e Beca ke fai ha fengāue’aki ‘a e Komiti Sipoti ‘a Tonga ní mo kinautolu ‘oku nau fakalele ‘a e Sipoti Komiuniueli ‘i Brisbane he ta’u ní, ke fai mai ha tokoni ‘o e ngaahi naunau ko ‘ení ki he 2019.

Ko e pa’anga lahi foki ‘eni ki Tonga, pea ‘oku te’eki ai pe ke mahino ia pe ‘e ma’u fua mei fē ‘a e pa’anga ko ‘ení. Kuopau aipē ke fai ha kole ki he ngaahi hoa langa fakalakalaká, kapau ‘oku ‘ikai fakapotopoto ke toe fai ha nō.

Kuo ‘osi fai hono fakamahino’i kuo ‘i ai ‘a e pa’anga ‘oku tukupā mai mei Nu’usila ki hono fakalelei’i ‘o Teufaivá; pea ‘oku ‘i ai ‘a e tala fekau’aki mo ha tokoni mei Papua Niukini mo Siaina, ka ‘oku te’eki ai ke mahino pe ko e hā e lahi e tokoni ko ia.

Ko e kotoa foki ‘o e ngaahi mala’e mo e naunau ki he Sipoti 2019 kuopau kenau a’usia ‘a e tu’unga fakapalofesinale fakavaha’apule’anga, kae tautefito ki he ngaahi fiema’u ‘a e International Rugby Board pea mo e IAAA (International Amateur Athletics Association).

Ko e fakamole lahi ‘e fai ia ki he mala’e sipoti Tonga High School, pehē ki he mala’e ‘akapulu, mo ha mala’e tāpulu fo’ou.

‘Oku fakafuofua ko e mala’e Tonga High School ‘e a’u ki he pa’anga Nu’usila ‘e NZ$30.32 miliona, pea ko hono fakaikiiki ‘e anga pehe ni:

Fale Sipoti – $26 miliona

‘Ofisi ngāue, fale fetongi, mo e ngaahi falemālōlō – $1.94 miliona

Kapeti ‘One’one ki he mala’e ‘Akapulu/Liiki – $0.47 miliona

Mala’e Hoki, Netipolo, Tenisi – $0.51 miliona

Artificial Bowls rink – $0.35 miliona

Tanu mo e fakamusie – $0.2 miliona.

Fakatatau ki he lipooti, ko e NZ$13.67 miliona ‘e fiema’u ki hono fakalelei’i ‘o Teufaiva.

Ko e fakamole lahi foki ‘e taha ko e mala’e tāpulu, ‘a ia ‘oku ‘amanaki ke langa ‘i Sia’atoutai. ‘Oku fakafuofua ki he NZ$6.5 ki he NZ$8.7 miliona.

Kuo ‘oatu foki mo ha fakatokanga ‘a e kautaha fale’í Beca fekau’aki mo e fiema’u ke taimi ‘a hono fai e ngāue ke ‘osi ki he Sipoti ‘o e 2019.

“Neongo ‘oku hangē koaa ‘oku kei mama’o ‘a e 2019, kā ‘oku ‘i ai ‘a e ngaahi ngāue lalahi ia kuopau ke fai, pea ‘oku tu’u tōmui ‘a e ngaahi ngāūe ko ‘ení,” ko e lau ia ‘a e kautaha fale’í.

Ko e ngaahi fiema’u vivili ki he Sipoti ‘o e 2019 ke lava ke ma’u e pa’anga fe’unga ke fai’aki e ngāue, pea ke fakapapau’i ko e mala’e tāpulu mo e ngaahi mala’e kehe, ke lava hono tisaini fakalelei, pea ma’u mo e kau ngāūe ke fai hono langá, pea ke taimi foki hono fai e ngāué.

‘Oku pehē ‘e he lipooti mei he Beca, ko e me’a mahu’inga ki he kotoa ‘a e ngaahi mala’e sipoti ko hono langa ‘a e feitu’u ‘oku ‘i ai ‘a e Polisi ‘i Vaololoa.

Ko e Sipoti foki ‘oku lau ko e sipoti ‘e lava ke fai ai e luelue pe ki he takitaha mala’e, pea ko hono mahu’inga ia ‘a e vavaofi ‘a e ngaahi mala’e.

(16)

Facebook Comments