Na’e fakamanatu ‘e he Pangike BSP he Tu’apulelulu ‘o e uike kuo ‘osi ‘aho 8 ‘o Ma’asi ‘a e ‘aho fakamamani lahi ‘o e kakai fefine ‘i honau ‘ulu’i ‘ofisi pe ‘i Nuku’alofa. Ko e ‘aho ‘eni ‘oku fakamanatua fakamamani lahi ai ‘a e ngaahi ngafa lavame’a ‘a fafine he mala’e ‘o e  fakasosiale, faka’ekonomika, tukufakaholo pea mo fakapolitikale. Neongo ‘a e ‘ikai ke tatau ‘a e ngaahi a’usia ‘a e ngaahi fonua kotoa ‘i he ngaahi ‘isiu tautonu mo fakapatonu pea mo ha’a fafine ka ‘oku ha mai ‘a e ngaahi fakalaka ki mu’a ‘a e ngaahi poletaki mo e tuiaki ‘a fafine ki he ngaahi taumu’a lahi ‘o tatau pe ‘i tu’apule’anga pea mo Tonga ni.

Ko e taumu’a na’e fakataumu’a ‘aki ‘o e ‘aho fakamamani lahi ‘o e kakai fefine ‘I he ta’u ni na’e ‘iloa ko e #PressforProgress pe ko e ui mo e tautapa  ke fakaivia mo tu’u fakataha mo e kaungame’a, kaunga ngaue, fakakau mai mo hoto komiuniti ke fakakaukau mo ngaue fakataha pea ke fakakau atu ‘a e ngaahi me’a ‘oku kaunga ki ha’a fafine. ‘Oku ‘i ai ‘a e ngaahi moto mo e taumu’a ‘o e ngaahi sosaieti ‘a fafine na’e fatu ‘o hange ko e Langafonua ‘a Fafine Tonga ko e “Ngaue Loto Taha pe” pea ‘oku fakamanava mai ‘a e ngaahi pou tuliki ‘o e ui ‘oku fai. ‘Oku kei tu’uloa mo e vanavanaiki ‘a e taha ‘o e ngaahi to folofola ‘a e La’a Hono Tolu “ Ko ho’o ako’i ha fefine, ko ho’o ako’i ia ‘a e fonua” ‘one falute mo katoi ‘a e ‘elito ‘o e mahu’inga ‘o e fakaivia ‘o fafine.

Na’e ngaohi ai ‘e he Pangike BSP ha keke (cup cakes) ‘o tufa ki he’ene kau kasitomaa mo kinautolu na’a nau hufia ‘a e pangikee ko e faka’ilonga’aki ‘a e ‘aho fakamamani lahi ‘o e kakai fefine. Na’a nau toe filifili mo ha kau mo’unga fefine mei he ngaahi tapa kehekehe pe ‘i Tonga ni ‘o fakalangilangi’i kinautolu mo e fakahounga ‘enau tou’anga he ngaahi tapa kehekehe ‘o e sosaieti mo e fonua.

Na’e fili’i mai ‘e he BSP ‘a e kau taupo’ou mei he Kamelaite mei Fahefa, Ofa Likiliki mei he WCCC, Tuna Fielakepa mei he Langafonua ‘a Fafine Tonga, Lavinia Satini mei he Senita Alonga, Linda Folaumoetu’I mei he ‘Ofisi ‘Omipatimeni, Dr. ‘Ana ‘Akau’ola mei he Potungaue Mo’ui, Rev. Dr. Mele’ana Puloka mo Dr. ‘Ana Koloto mei he mala’e ‘o e ako, Leda Kami mei he Komiti ‘o e Fokoutua he Kanisa Huhuu, Katalina Tohi mei he Fakamafola Lea mo e faiongoongo, Tu’imala Kaho mei he Faiva mo e musika, ‘Eleni Mone mei he kau ‘ofisa Polisi tutuku pea mo ‘Eseta Fusitu’a he mala’e ‘o e politikale.

Na’e mahu’inga ‘a e taimi mo e ngaue ‘a e kau fefine na’e filifili mai ‘o faka’ilonga’i ‘enau ngaahi ngaue ma’ongo’onga he sosaieti pea mo e fonua, ko ia ai na’e pehe ‘e Salesi Fineanganofo, na’e teuteu’i ‘enau keke pea fakapipiki ki ai ‘a e ngaahi kupu’i lea fakaloto fakalotolahi ‘iloa felave’i mo fafine mei he kakai ‘iloa ‘i mamani. ‘Oku mahu’inga ki he Pangikee ‘a e ngaahi lavame’a ‘a fafine kuo tu’uloa pea paotoloaki ‘a ‘enau ngaahi taukei ‘o falute ‘a e ngaahi lelei mo fakatafe mai ‘a e ngaahi ‘ilo mo e taukei ‘o ope mai mei honau ngafa tefito ‘o e tauhi ‘api ke fakalato ‘a e ngaahi ngaue ma’a e fonua ‘oku ola pea ko e pou maama ke fakalekesi ‘a e Tonga ‘i he lotu ako mo e ngaue’i ‘o e ekonomika, tu’unga fakasosiale pea pole’i mo e taukei ‘o e mala’e politikale. ‘Oku poupoua ‘e he Pangikee ‘a e fevahevahe’aki ‘a Fafine mo Tangata ‘i he ngaahi faingamalie ‘o potupotu tatau pea ‘oku nau tu’u ke pouaki mo fakaivia ‘a fafine ‘i he mala’e ‘o e taukei fakakomesiale pea mo e ako ‘i he Pasifiki.

(12)

Facebook Comments