KUO ma’u e tala faka’ofisiale kuo fekau ke fakafisi ‘a e Minisitā, Pa’anga Dr. ‘Aisake Eke, Pea kuo fetongi ‘a ‘Aisake Eke ‘e Tevita Lavemaau. ‘Oku ‘oatu ‘a e talanoa ki he me’a ni he ‘ulu’i ongoongo ‘a e nusipepa ki he uike ni.

Ko e ‘uluaki faka’ali mai kuo fakahifo ‘a ‘Aisake, na’e ha’u ia mei he polokalama ko e TNews ‘i ‘Okalani, Nu’usila, ‘a ia ‘oku fakalele ‘e Setita Mila. Ko Setita ko e kaungā ngāue ofi ia ‘o ‘Akilisi Pohiva, pea ko ia foki ‘oku ne fakalele ‘a e nusipepa Kele’a mei Nu’usilá.

‘Oku kau ‘a e TNew mo e Kele’a he ongo mitia ‘oku me’angāue’aki ‘e ‘Akilisi. Pea ko e ongo mitia ia ‘oku pehē pe ko e me’angāue fakapolopakenita ‘a e Palemia mo e Pule’angá.

Ko ia ai ‘i he ‘omai ‘e he TNews ‘a e ongoongo fekau’aki mo ‘Aisake Eke, na’e fai e tui ki ai koe’uhí ko e taha ia e ongo ngutu ‘o e Palemia. Ko e hā pe me’a ‘oku ha’u mei he Kele’a pe ko e TNews, ‘oku mahino ko e me’a ia ‘oku mo’oni, mei he tafa’aki ko ia ‘a e Palemia.

Ko e mo’oní foki kuo ki’i fuofuoloa pe ‘a e fa’a tu’u fehangahangai ‘a e Palemia mo ‘ene Minisitā Pa’angá, pea ko kinautolu ‘oku ofi ki he Minisitā Pa’angá ‘oku nau pehē pe ‘oku ‘i ai e ngaahi me’a ia ‘a e Pule’angá ‘oku ‘ikai ke fu’u fiemālie ki ai ‘a e Minisitā Pa’angá.

‘Oku kau foki heni ‘a e founga ngāue ko ia ke ‘oatu ha pa’anga ‘a e Pule’angá, ‘o

‘ikai ke fou he founga totonu pe anga maheni.

Na’e kau foki heni ‘a e ngaahi founga totongi pa’anga ‘o ‘ikai fakahoko e founga kole totonu ko ia ki Fale Pa’angá. Pea ‘oku kau heni ‘a e felauaki mo e fefusiaki he taimi na’e kei Minisitā ai ‘a ‘Etuate Lavulavu.

Kā, ‘i he feme’a’aki ‘a e Palemia mo Minisitā hili ‘a e paloti ke fakahifo ‘a e Palemia, na’e pehē ai ‘e he Palemia ‘oku “lelei pe ‘a e fengaue’aki ‘oku fai.” Pea ‘i he ‘aho pe hono hoko kuo fekau ke fakafisi. Ko e founga ngāue anga maheni pe foki ‘eni ‘a e Palemia ko ‘eni, ko e lea’aki e me’a kehe, pea fai e me’a kehe.

Ko Tevita Lavemaau, ko e Minisitā Pa’anga fo’ou ‘oku maheni pe ia mo e ngāue pa’anga ‘a e Pule’angá. ‘Oku poupou ki heni ‘a e Kapineti, pea ko e ‘uhingá, ‘oku ‘ikai ngata pe he’ene taukei ka ‘e toe lava ange ia ke fengāue’aki ofi mo e Palemia.

Kā, ‘oku kei mo’ui pe ‘a e ngaahi fehu’i ki he founga fai ‘a e Palemia, he ‘ene ‘ikai loto ke toe ‘i ai ha tu’u makehe meiate ia, he ko ‘ene founga ‘oku mahino ‘a e ‘ikai ke ne tui ki he temokalatí, ka ‘oku fakatikitato ‘aupito.

Na’e fakahā ‘e he Palemia ki ha kau faiongoongo, koi a ko e takí kuopau ke ne fai e tu’utu’uni. Kā, ko ‘Aisake, mei he Tepile ‘o e Kapinetí, pe Pule’angá, na’a ne lotolahi ke fili’aki hono konisenisi kae ‘ikai ke fakaloto’i mo afea hono lotó mei hema pe ko mata’u.

(43)

Facebook Comments