‘OKU fakafepaki’i fefeka ‘e Lord Fusitu’a, mo ha ni’ihi ‘i he Fale Alea ‘a e Fakatonutonu ki he Lao Fakaangaanga ki he Lao ki he Fakamo’oni 2016, he ‘oku ne tui ‘oku tu’u fehangahangai ‘a e fakatonutonu ko ‘eni mo e Konisitutone.

Ko e fakatonutonu ko ‘eni ki he Lao Fakamo’oni kuo ‘omai ‘e he Pule’anga ki he Fale Alea, ke “’ikai fiema’u ha toe fakamo’oni pau (collaboration evidence) mei he mamahi fekau’aki mo e faka’iloa.”

‘I he lolotongá ‘oku fai’aki pe ‘a e fakapotopoto ‘a e Fakamaau ‘i he ‘ene vakai ki he fakamo’oni mei he mamahi pea mo e faka’iloa, kā ‘oku fiema’u ‘e he Pule’anga ke “fakafaingofua’i” ‘a e ngaue ‘a e Fakamaau’anga fekau’aki mo e me’a ni, lolotonga ko ia ‘oku ‘ikai ko e makatu’unga ia ke fai hano fakatonutonu ‘o e Lao, tautefito kapau ‘oku ‘i ai ‘a e tui ia ‘oku fepaki ‘a e fakatonutonu ko ia mo e Konisitutone.

‘I he fakamalanga ‘a Lord Fusitu’a ki he Komiti Kakato, na’a ne fakatātā’aki ‘a e ‘omai ki he Fakamaau’anga ha tokotaha kuo ‘i ai hano hisitolia ki ha hia.

“Pehē mai he Fakamaau tama ko ‘eni kuo hia ia, ‘oku ‘osi pau ‘oku halaia ia. Kapau te tau fua’aki e me’a sivi ko ia ‘e ala hoko ke fakahala’ia’i ha taha pehē ‘oku lolotonga tonuhia, pea ko e ‘uhinga ia ‘oku ‘ikai keu tui ki ai (ki he fakatonutonu ko ‘eni).

Na’a ne pehē foki ‘oku hanga ‘e he Lao Fakatonutonu ko ‘eni mei he Pule’anga , ‘o to’o e totonu ko ia, “fa’ao ia mei he tangata’i fonua mo e fefine’i fonua Tonga kotoa” ‘a e pau ke “ope atu ‘i he toe veiveiua” (beyond reasonable doubt).

Na’e fai foki ha fakatātā fekau’aki mo ha ongo tama kaiha’a, pea ko e lao fakatonutonu ko ‘eni te ne to’o ‘e ia ‘a e lava ke ‘omai e fakamo’oni mei he kaungā kaiha’a fekau’aki mo e ‘uluaki tokotaha faka’iloa.

Ko hono toe ‘ai mahino ‘e taha, ‘e lava pe ke hao tonuhia ‘a e kaunga kaiha’a ia kae halaia ‘a e tokotaha pe.

Mei he tafa’aki koee ‘a e mamahi, ‘oku ‘ikai ke toe fai ha fiema’u fakamo’oni makehe mo pau ia (collaborated evidence) kae fai’aki pe fakamatala ‘a e mamahi. ‘I he’ene pehe ‘e lava pe ke toki fai’aki ‘a e fakama’opo’opo ‘a e Fakamaau pe kohai ‘oku tui ki ai, ko e Faka’iloa pe ko e Mamahi, ta’etoe fiema’u ha fakamo’oni pau.

Kā, na’e lea foki ‘a e ‘Eiki Palemia, Samiuela ‘Akilisi Pohiva ‘o pehē: “’Oku mahino ‘aupito pe fakamo’oni, ‘ikai ke ‘i ai ha taha ia ‘e ta’etui ki ai he tepile ko ‘eni. Fiema’u e fakamo’oni ke fakamo’oni’i pau ‘a e, ka ko e ‘uhinga kou fanongo ki he lea ko e pelepelengesi.”

Na’a ne pehē ko e kau Fakamaau ‘oku nau kole mai ki ha fakatonutonu ‘o e lao koe’uhi ko e “pelepelengesi”, kae tautefito ki he ngaahi hopo tohotoho.

Na’e pehē ‘e he ‘Eiki Palemia: “Pe ‘oku mahino e fo’i lao ‘oku ‘uhinga pe ki he keisi pelepelengesi. Ko e fakamatala ko ‘eni ‘oku tau fanongo ki ai ‘oku ne to’o fakalukufua mai mo e ‘u hia kehe. Kou kole atu tuku e ‘u hia kehe ka tau nofo he fo’i hia ko ‘eni ‘e taha ko ‘eni ‘oku pelepelengesi.”

Pea ko e taha ‘eni foki e me’a ne fakafepaki’i lahi ‘e Lord Fusitu’a, ko e hange koee ‘oku fakakalakalasi kehekehe ‘a e ngaahi hopo hia, pea lao kehe ke fakahoko’aki e fakamaau’i ‘o e hia “pelepelengesi” kae kehe ‘a e ngaahi hia kehe ia.

Na’e pehē ‘e he Fakafofonga Nopele Niua ‘oku hanga ‘e he Fakatonutonu Lao ko ‘eni ‘o fakafaikehekehe’i pe fakakalasi ai ‘a kinautolu ‘oku ‘omai ki he Fakamaau’anga.

Ko e ni’ihi ‘oku fakamaau’i ‘e he Lao kehe, pea fakamaau’i ‘a e ni’ihi ‘aki ‘a e Lao kehe.

“’E tatau pe ‘a e ki he kakai kotoa pe ‘a e Lao ‘o Tonga,” ko Lord Fusitu’a ia.

Na’a ne fakamalanga fefeka ki he monuka ‘a e Kupu 4 ‘o e Konisitutone ‘e he ngaahi Lao Fakatonutonu ‘oku ‘omai mei he Pule’anga.

“Ko ia ‘Eiki Sea. Ka, ko e fakahoha’a ‘a e motu’a ni he ko e pehē koee ‘e he lao he ‘ikai ke hilifaki e lao ki ha fa’ahinga kae tuku ha fa’ahinga, ‘oku ‘ikai ke ne fakafaikehekehe’i fakakalasi fakasosiale… kapau ‘oku ‘ikai fakafua hia,” ko Lord Fusitu’a ia.

Na’e toe pehē foki ‘e Lord Fusitu’a na’e ‘omai ‘e he Pule’anga ‘a e Ngaahi Lao Fakaangaanga “he uike atu” pea nau toe vakai ‘oku fepaki ‘eni mo e Konisitutone, pea ko ia ne nau toe fakahū “fakavavevave mai” ‘a e kupu ‘e taha he uike ni, ke fakatonuhia’i’aki ‘a e ngaahi Lao kimu’a.

Ko e Lao Fika 126 mo e 127 ‘eni, ‘a ia ‘oku fai ai e fakatonutonu ki he Lao Fakamaau’anga, ke to’o e totonu ‘a ha taha ke hopo sula.

Ko e fakatātā foki ki heni ko ha ‘omai ha ongo faka’iloa ki he Fakamaau’anga pea loto e tokotaha ke hopo Fakamaau pe, kae lolotonga ko ia ‘oku to’o ai ‘a e totonu ‘a e kaunga hia ke hopo sula ia.

Ko e taha pe foki ‘eni e ngaahi Fakatonutonu Lao kuo ‘omai mei he Pule’anga ke fakafaingofua’i ‘aki ‘a e ngāue ‘a e Fakamaau’anga, kā ‘oku fepaki ‘eni mo e totonu faka-Konisitutone ‘a ha taha tukuaki’i ke hopo sula pe ‘ikai.

Fekau’aki mo e lau ‘a Lord Fusitu’a ki he ‘ikai ke tatau e Lao ki he tokotaha kotoa pe kapau ‘e tali e fakatonutonu ko ‘eni ‘a e Pule’anga, na’e me’a hake ai ‘a e ‘Eiki Palemia ‘o ne pehē: “Ko e lao he fonua ni ‘oku ‘ikai ke tatau ki he tokotaha kotoa pe.”

Kaekehe, na’e fokotu’u ‘e Lord Fusitu’a ki he Pule’anga ke toe fakafoki ‘enau ngaahi Lao ‘o fai ha ngāue ki ai, pea toe fakafou mai he ngaahi sino angamaheni, kimu’a pea toe ‘omai ki he Fale Alea.

(24)

Facebook Comments