Rev Havili Mone

Rev Havili Mone

KUO halaia ‘a Faifekau Havili Mone ‘i ha Fakamaau’i ‘e ha Sula ‘a e Siasi United Methodist ‘i ‘Amelika. ‘Oku halaia ‘a Mone mei he’ene maumau’i ‘a e lao ‘a e Siasi ke lipooti ‘a e pa’usi’i ne hoko ‘Iihono Siasi ‘e ha ki’i tamasi’I ta’u 14 ‘a e fānau tangata iiki ‘i he Siasi.

Ko e taha e tu’utu’uni ‘a e kau Sula ke fakahifo ‘a Mone, pea ‘ikai ke ne toe hoko ko ha memipa ‘o e Siasi United Methodist.

Kā, ‘oku kei faifekau pe foki ‘a Mone he Siasi Uesiliana Tau’ataina ‘o Tongá.

Ko e tala tu’utu’uni ko ‘eni na’e fakahoko ia ‘i he uike kuo ‘osí mei ha kau Sula ‘e toko 13 ‘a e Siasi, hili ia hano Fakamaau’i ‘o e faifekau ha ‘aho ‘e ua, ‘a ia na’e fai ‘i Longmont, Colorado, ‘Amelika.

‘I he Fakamaau’i ha taha ‘i he Siasi, ‘oku fai ‘a e tali ‘a e tokotaha tukuaki’i ki he ngaahi me’a ‘oku faka’ilo ai ia, ‘o fekau’aki mo e maumau’i ‘o e ngaahi lao faka-Siasi ‘a ia ‘oku ‘i he tohi “Book of Discipline” ‘a e Siasí.

Ko e fakamatala ‘eni kuo tukumai mei he ongoongo ‘a e Siasí.

Na’e pehē ‘e he loea ma’ae Siasi, Faifekau Ron Hodges, ko e ngaahi fakamo’oni na’e ‘omai ki he Sula na’e mahino ‘aupito pea falala’anga.

Ko e fakafofonga ‘o Mone, Faifekau Keith Watson, na’a ne pehē ‘oku ne loto mamahi he tu’utu’uni na’e faí.

Kā, na’a ne pehē ‘oku ne faka’apa’apa’i pe ‘a e tu’utu’uni ‘a e kau Sula, he “ko e tu’utu’uni faingata’a, pea toe fakalotomamahi foki kiate kinautolu.”

Na’e ‘ikai foki ke ma’u ‘a Mone ke fai ha’ane lau ki he me’a kuo hokó.

‘Oku ‘iloa pe ‘a Mone ‘i Utah, talu mei he ‘Olimipiki ‘o e 2002 ‘i he’ene to’o fo’i ama ‘Olimipikí ai.

 

Fakanofo fakataimi he 2012

Na’e fakanofo fakataimi ‘a Mone he 2012 lolotonga hono fakatotolo’i ia ki he ngaahi launga he Siasi, ka na’e ‘ikai ke fai ha fu’u talanoa ki ai.

Na’e faka’ilo ai ‘a Mone ‘i he Fakamaau’angá ‘i Tisema ‘o e 2012 ki he hia Kalasi B, ko e ‘ikai ke ne lipooti ‘a e pa’usi’i ‘o ha tokotaha ta’u si’i.

Na’e tu’utu’uni ai ‘a e Fakamaau he Fakamaau’anga West Valley ke ne mo’ua ‘o tautea ke ngāue komiuniti ha houa ‘e 50.

Ko e tamasi’i ta’u 14 na’a ne fakahoko ‘a e pa’usi’i na’e halaia ‘i he Fakamaau’anga ki he pa’usi’i ‘o ha ta’u si’i, pea ne ngāue popula ai, ‘o ala a’u ‘o toki tukuange hono ta’u 21.

‘Oku mahino ko e mo’ua ko ia ‘o Mone he Fakamaau’anga ‘a Utah, ne kau ia he me’a ne fai ki ai ‘a e tu’utu’uni ‘a e kau Sula ‘a e Siasi United Methodist.

‘Oku kei fehu’ia pe foki pe ko e hā e ‘uhinga na’e ‘ikai ai ke lipooti ‘e he faifekau ‘a e me’a na’e hokó ki he kau Polisi, pe ki he’ene faifekau na’e taliui ki ai.

‘I ‘Aokosi ‘o e 2012 lolotonga ‘a e fakatotolo’i ‘o Mone, na’e ‘omai ai ‘e he Siasi ‘a Faifekau ‘Etuini Kelemeni mei Hauai’i, ke ne faifekau fakataimi he Siasi.

Ko Kelemeni na’e ‘osi faifekau mālōlō ia he Siasi United Methodist ‘i Hauai’i.

Hili ha uike ‘e 6 ‘o e fakahifo fakataimi ‘a e Siasi, na’e ‘i ai ‘a e kau memipa ‘e toko 150 na’a nau fakahāhā kinautolu ‘enau poupou kia Mone. Ko e Siasi na’e toko 600 he taimi ko ia.

Ko e Pisope ‘o e ngaahi Siasi kau ai ‘a e Siasi ‘o Mone, ‘a ia na’e ui ko Laumalie Ma’oni’oni, ko e fefine ko Elaine Stanovsky, ‘a ia na’e faifekau ‘i Colorado. Ko e faifekau ‘eni na’e taliui ki ai ‘a Mone.

Na’a ne fai ha tohi kia Mone ke fakahā ki ai kuo to’o ia mei hono lakanga ko e ‘ikai ke ne lipooti he taimi ne hoko ai ‘a e pa’usi’i ne hoko ‘i hono Siasi, ‘a ia kuo fakahalaia’i ‘e he Fakamaau’angá.

‘I he tohi ‘a Stanovsky, na’a ne pehē ai ‘oku ne teuteu ke tapuni ‘a e ngaahi launga fekau’aki mo Mone he ‘aho 15 Novema 2012, pea ke fakangata ‘ene faifekau he Siasi “Laumalie Ma’oni’oni”.

Na’a ne pehē na’e feinga ‘a Mone ke fai ha ngāue ki he pa’usi’i na’e hokó, pea na’e ‘ikai ke ne fai e ngāue ‘oku taau mo e ngaahi fiema’u ‘a e Siasi United Methodist, pea toe ‘ikai ke fakapalofesinale ko ha faifekau ‘i ‘Amelika.

Na’e pehē ‘e Stanvosky ko e ngaahi launga fekau’aki mo Mone, koe’uhí ko ‘ene tōnounou he’ene ngāue fakataki hili ‘ene ‘ilo ki he pa’usi’i na’e hoko, pea ne toe ta’efaka’apa’apa foki ki he ‘ofisi na’e taliui ki ai.

“’Oku mau fakame’apango’ia ki he mole ha kaungame’a mo ha kaunga ngāue he ta’u lahi meiate kimautolu,” ko Stanvosky ia, “kā ‘oku mau ‘ilo’i ‘e hokohoko atu pe ‘a e ngāue ‘a e ‘Eiki he mo’ui ‘a e tokotaha ni.”

 

Mavae ua Siasi pea toe hoko ha fuhu

‘I he taimi ko ia na’e hoko ai ‘a e fakahifo ‘o Mone, pea ‘ilo ki ai e Siasi, na’e hoko ha palopalema lolotonga e fakataha na’e fai he falelotú. Na’e ‘i ai e fa’ahinga na’a nau lotomamahi pe ko e hā koaa na’e fakanofo ai ‘a Mone.

Na’e hanga ‘e ha taha ia ‘o kamosi ‘a e fafangu tamate afí ‘i he ‘aho 18 Novema 2012 na’e fai ai ‘a e fakataha, pea ‘alu e kakai kitu’a. Kā, na’e fai ha felauaki, pehē mo ha tolongi ha fo’i hina vai, pea hoko mo ha fe’ohofaki.

Na’e toki omai e kau Polisi ‘o fai e pukepuke ‘o e me’a na’e hokó. ‘Oku pehē ‘e he ngaahi fakamatala ko e ongo fa’ahi na’e fe’ohofakí, ko e fa’ahi ‘e taha ko e kainga ‘o e tokotaha na’e pa’usi’i, pea ko e fa’ahi ‘e taha mei he ki’i tamasi’i ta’u 14 na’e tukuaki’i.

Na’e hoko e fakahifo ‘o Mone ke mavaeua ai ‘a e Siasi. Ko e tokolahi ‘o e kau mavahe na’a nau paloti ke liliu e hingoa ‘o e Siasi ki he “The Salt Lake City Laumalie Ma’oni’oni Free Wesleyan Church of Tonga. Pea ke fili ha Poate fo’ou, pehē mo hano liliu e ngaahi me’a fakapepa fekau’aki mo e fokotu’u e Sosaieti lotú.

Ko kinautolu koee na’a nau fakafepaki’i ‘a e fai ha liliú, na’a nau fili ‘a ‘Elimani Ma’afu ko e Palesiteni ‘o e Siasi, ‘a ia ‘oku nau kei ui pe ko e Tongan United Methodist Church.

Ko Havili Mone mei Folaha/Kolomotu’a. ‘Oku ne kei hoko pe foki ko e faifekau he Siasi Uesiliana Tau’atāina ‘o Tonga. Na’a ne faiako ‘i he Kolisi Sia’atoutai kimu’a pea ne hiki ki muli. Ko e tehina ia ‘o e Palesiteni Mālōlō ‘o e Siasi Uesiliana, Faifekau ‘Alifeleti Mone.

(94)

Facebook Comments