Fiji smashes Tonga A

Ko e ‘ulungia tu’o tolu ‘eni ‘a e timi ‘akapulu Tonga A he fe’auhi ‘o e timi ‘e 4 ‘oku fai ki Fisi ‘I he World Rugby Pacific Challenge. Ko e fo’i fakamamahi ‘eni he na’e 50 ki he 0 ‘a e kai ‘i hono matu’aki haveki ‘e he Samoa A, ‘i ha tau fakapalataha he Tokonaki 12 Ma’asi.

Pea ko e tau mo Fisi ‘i he Tu’apulelulu 17 ‘o Ma’asi na’e 56-18.

Neongo na’e ‘i ai ‘a e ki’i ta’ovaala ‘o e Tonga A, ka na’e fakapalataha aipe va’inga ki Fisi. Na’e toe tuli foki ha tokotaha, pea tuli fakataimi ha toko ua.

Ko e fe’auhi foki ‘eni ‘o e World Rugby Pacific Challenge ‘a ia ‘oku fakahoko ‘i Suva ‘oku kau ki ai ‘a e Fiji Warriors, Samoa A, Tonga A, pea mo e Junior Japan.

Ko e ‘uluaki ‘ulungia ‘a Tonga ‘i he Tusite 8 ‘o Ma’asi ki he Junior Japan. Ko e kai ko e 26 ki he 8.

Na’e pehe ‘e ‘Isi Fatani, ko e faiako ‘o e timi, ki he nusipepa Fiji Times, “ko e me’a fakamamahi mo’oni ‘a e tu’unga na’e ‘i ai e va’inga ‘a e timi.”

Na’a ne pehe ‘oku lahi e kau va’inga fo’ou ta’u si’i he 21.

“Ko e ‘uluaki taimi ‘eni ki he tokolahi ‘o e timi kenau va’inga ha tunameni fakavaha’apule’anga pehe ni, ka ‘i he lele loloa ‘e tauhi pe kau va’inga ko ‘eni ke teu’i kinautolu ki he ta’u kaha’u. ‘I ha ta’u ‘e ua nai, tenau fakalaka ‘aupito,” ko ‘Isi ia.

Ko e va’inga faka’osi ‘a e Tonga A ‘e fakahoko ia he uike kaha’u, ko e tau mo Junior Japan ke sio pe kohai ‘e fika muimuitaha. Kuo ‘osi fo’I foki ‘a Tonga ia he ‘uluaki tau.

Na’e fakahoko foki ha liliu ‘e 6 ki he timi Tonga A, ke tau mo Fisi.

‘Oku te’eki ai ke ‘ulungia ‘a Fisi, hili ia ‘enau malohi ‘i Samoa A 34-6 pea ‘i Junior Japan 44-14, ‘i he takai ‘uluaki mo e takai ua. Pea ko kinautolu ‘oku poini lahitaha, ‘a ia ko e 15, hoko hajke ki ai ‘a Samoa A ko e 10, pea Siapani 4, ko Tonga ko e 0.

Ko Samoa A ten a fainolo mo Fisi, hili ha vevela’i ‘e Samoa A ‘a Junior Japan, 42-22.

Ko e fainolo ‘e fakahoko ia he Monite 21 Ma’asi.

 

(10)

Facebook Comments