PILINISESI SIUILIKUTAPU

Na’e katoanga’i he Tokonaki ‘o e uike kuo ‘osi ‘aho 12 ‘o Me ‘a e makamaile ta’u 70 ‘o e Ta’ahine Pilinisesi Mele Siulikutapu Kalaniuvalu Fotofili ‘i he Holo Fakamanatu ‘o Kuini Salote.

Ko Pilinisesi Mele Siu’ilikutapu ko e ‘alo lahi taha ia ‘o Pilinisi Fatafehi Tu’ipelehake (tehina ‘o Taufa’ahau Tupou IV) mo Pilinisesi Melenaite kuo na pekia. Ko e ngaahi ‘alo ‘o Fatafehi Tu’ipelehake mo Melenaite ko Pilinisesi Mele Siu`ilikutapu Kalaniuvalu Fotofili, Pilinisesi ‘Elisiva Fusipala Vaha’I (pekia), Pilinisi ‘Uluvalu Takeivulai (pekia), Pilinisesi Mata ‘o Taone Ma’afu, Pilinisesi Sinaitakala ‘Ofeina ‘e he Langi Fakafanua pea mo Pilinisi Viliami Tupoulahi Mailefihi kuo pekia.

Na’e ta’ane ‘a Pilinisesi Siu’ilikutapu kia Kalaniu Fotofili ‘o ‘i ai ‘a hono ‘alo ‘e 2 ko Tiofilusi (kuo pekia) pea mo Tepiuti – Kalaniuvalu Fotofili ‘o e ‘aho ni.

‘I he polokalama ‘o e Tokonaki na’e ‘afio ai ‘Ene ‘Afio Tupou VI mo e ta’ahine Kuini Nanasipau’u, fale’alo, hou’eiki ‘o e fonua, famili pehe ki he kau fakaafe ‘a e Ta’ahine Pilinisesi ‘a ia na’e fakahoko ‘a e talitali ‘e HSH Pilinisi Kalaniuvalu mo HSH Lady Marcella ‘o tokoni ki ai ‘a e ngaahi ‘alo mo e makapuna ‘o Fatafehi mo Melenaite.

Ko e ngaahi fakame’ite na’e fakahoko pe ‘e he ngaahi makapuna ‘o e kau ta’ahine Pilinisesi pehe ki makapuna ‘o Mailefihi mo ‘Uluvalu pea mo Halatuituia.

‘I he Sapate na’e talitali ai ki he ‘Api ko Villa ‘a e famili ‘e he Tama Tu’i mo e Ta’ahine Kuini pea ko e katoanga fiefia tautefito ki he me’a ‘a Lord Tuita mo e ngaahi manatu melie ‘a e Ta’ahine Pilinisesi Pule Pilolevu Tuita.

Ko Pilinisesi Mele Siu’ilikutapu ko e lahitaha ia ‘i he ngaahi mokopuna fefine ‘o Kuini Salote pea ko Pilinisi Taufa’ahau Manumataongo ( Kingi Tupou V kuo hala ) ‘a ia na’e ‘alo’i pe kinaua ‘i he 1948 ‘i Me kae lahi ‘aho ‘a Pilinisi Taufa’ahau ‘ia Siu’ilikutapu.

Ko Siu’ilikutapu ‘a e fuofua fefine ke hu ki Fale Alea pea ko ‘ene ngaahi visone mo e tataki fakalaumalie ‘oku mahulu atu ‘ene a’usia ‘a e ivi ngaue ‘o e ‘EIki. ‘Oku ‘ikai ke ngata pe ‘i Tonga ni ka ‘oku kau mo tu’apule’anga ‘a hono fakaafea ‘a e Ta’ahine Pilinisesi ke ne me’a ‘o vahevahe ‘a e ngaahi a’usia ‘o e folofola.

‘Oku lahi me’a ‘a e ta’ahine ‘i Nu’usila koe’uhi ko e ngaahi faito’o ki hono tengetange pea ‘oku tauhi kiate ia ‘a Ma’asi Kalaniuvalu ta’ane ‘o Kalaniuvalu (Tiofilusi ) kuo pekia

(80)

Facebook Comments