“ Ka ko hai ‘oku ne fale’i kinautolu?”

Ko e taha ‘o e ngaahi ‘uuni me’a na’e nofo taha ki ai ‘a e talanga ‘a e kau faiongoongo lolotonga ‘a e fakataha mo e ‘Eiki Palemia ‘i he Falaite ‘o e uike kuo ‘osi ko e to’o hala’i ‘oku feinga ‘a e Palemia mo ‘ene Kapineti ke nau to’o ‘a e mafai ‘o e Tu’i.

   Na’e me’a ‘a e ‘Eiki Palemia ‘o pehe ko e liliu (reform) ‘o e 2010 na’e foaki mai ai ‘a e mafai pule (executive power) ‘o ‘Ene ‘Afio ‘o fili ‘a e Palemia mei he kau fakafofonga ‘o e kakai pea fili ‘e he Palemia ‘a e kau Minisitaa pea mei he ni’ihi na’e fili ki Fale Alea pe ko e fili mei tu’a. Ka ko e konga lahi ‘o e mafai pule ‘oku kei ‘i he Tu’i pe.

   Na’a ne fakama’ala’ala ‘o pehe ko e kau fale’i ‘o e Tu’i ‘oku fili pe ‘e he Tu’i pea ko kinautolu ‘oku nau fehu’ia he ‘oku ‘i ai ‘a e tui ‘oku totonu ke ‘i ai ha taha tonu pea mei he Kapineti ke nau kau atu ‘i hono talanga’i e ngaahi me’a ‘oku fakahū atu ki he Fakataha Tokoni.

   Na’a ne hoko atu ‘o pehe ‘oku ‘i ai ‘a e ngaahi Lao ‘e 5 ‘oku kei ‘i he Fakataha Tokoni pea ko e 2 ai mei he Pule’anga ‘o Tu’ivakano pea mo e 3 mei hono taimi.

   ‘Oku ‘ikai ke paasi ‘a e ngaahi lao ‘oku fakapaasi mei he Fale Alea kae ‘oleva kuo fakamo’oni huafa ki ai ‘a ‘Ene ‘Afio. ‘Oku tui ‘a e ‘Eiki Palemia ‘oku totonu ke hu atu ha ni’ihi mei he Kapineti ke mahinoange ‘a hono fakamatala’i ‘o e ngaahi fokotu’u pea si’isi’i ai ‘a e fetokehekehe’aki.

    Na’e tanaki mai ‘a e ‘Eiki Minisita Pa’anga mo e Palani, Pohiva Tu’i’onetoa ‘o fakamahino ko e kakai ko ‘eni ‘oku fale’i ‘oku ‘ikai kenau taliui (accountable) ki he kakai ka ko kinautolu (Kapinetí) ‘oku nau taliui ki he kakai. Ko e ‘ikai pe ke fiemalie ‘a e kakai kiate kinautolu ‘e ‘ikai ke nau toe fili ‘iate kinautolu.

   Na’e ‘i ai ‘a e felave’I tonu ‘o e talanga ni pea mo e talanoa ki he aleapau ‘a e Komisiona Polisi. Na’e fakahā kuo ‘ikai ke toe loto ‘a e Kapineti ke toe fakaloloa ‘a e aleapau ngaue ‘a e Komisiona pea kuo ‘osi ‘oatu pe ‘a ‘enau fokotu’u ki he Fakataha Tokoni ‘a ia ‘e aofangatuku mei ai.

    ‘I he Sapate 25 ‘o Ma’asi na’e ha mai ai ‘i he uepisaiti ‘a e Kaniva ‘a e fakamanamana ‘a e Minisita Polisi Mateni Tapueluelu te ne ta’ofi ‘a e vahe ‘a e Komisiona ‘o kapau ‘e tali ‘e he Tu’i ‘a e fokotu’u atu mei he penolo ke fakaloloa ‘a ‘ene aleapau ngaue.

   ‘Oku mahino ko e kau fale’i ‘o ‘Ene ‘Afio ‘oku ‘ikai ke fili noa’ia pe ‘a ia ko e kakai tu’ukimu’a he mala’e ‘o e lao pea mo falala’anga ‘o hange ko kinautolu ‘i he penolo ‘oku kau ki ai ‘a Faifekau Dr Tevita Havea ko e Sekelitali Lahi ‘a e Siasi Uesiliana Tau’ataina ‘a Tonga; pehē kia Linda Folaumoetu’i ko e Omipatimeni le’ole’o ‘a e fonua mo e ni’ihi kehe pe.

    Lolotonga ‘a e fakamanamana ‘a Mateni ‘oku mahino ko e vahe ‘a e Komisiona ‘oku meimei fua kotoa ‘a e fakamole ‘e he Pule’anga Nu’usila ‘o toki ‘i ai ‘a e konga ‘oku fua ‘e he Pule’anga Tonga. Ko e Komisiona mālōlō Grant O’Fee na’e ‘i he pa’anga Nu’usila ‘e 2 kilu fitu mano ‘oku totongi ‘e Nu’usila pea ko Tonga ko e 3 mano 3 afe pe na’a ne totongi.

   Kuo mahino foki na’e ‘osi fakahā pe ‘e he Pule’anga Tonga ki he Palemia ‘o Nu’usila lolotonga ‘ene ‘a’ahi mai ki Tonga ni ‘oku ‘ikai ke fiema’u ke toe fakaloloa ‘a e aleapau ngaue ‘a e Komisiona Polisi ka ‘oku tau fakatatali ki ha tali mei he Pule’anga Nu’usila felave’i mo e fakamanamana ko ‘eni ‘a e ‘Eiki Minisita Polisi.

   ‘Oku mahino ‘a e kau fale’i ‘o e Tu’í ka ko e taimi ‘oku fai tu’utu’uni hala ai ‘a e Pule’anga ‘oku taliui nai ki he kakai na’a nau fili kiate kinautolu pea ‘oku hā mai kohai na’e fale’i ma’a kinautolu? Ko e situ’a ‘eni mei hono ‘ohake mo hono ‘ohifo ‘o Tonga koe’uhi ko e tu’utu’uni ‘a e Minisita Ako ke ta’ofi ‘a e fanau fefine mei ‘akapulu. Na’e ma’u fale’i nai meia hai?

    ‘Oku teu atu ‘a e ‘eke ‘a e Kosilio ‘o e Sipoti ‘a e Pasifiki ki he maumau’i ‘e Tonga e aleapau Sipoti ‘o e 2019, kohai nai na’a ne fale’i ‘a e Pule’anga? ‘Oku toe fehu’ia lolotonga ‘a e fakamanamana ‘a e ‘EIki Minisita ki he vahe ‘a e komisiona kohai na’e ma’u fale’i mei ai ke ne ‘ilo ‘a e ki’ihi silini ‘oku totongi ‘e Tonga? Kohai ‘oku toutou ma’u fale’i mei ai ‘a e Pule’anga ki he ngaahi ‘uuni faitu’utu’uni kuo nau fakahoko?

    Ko e fehu’i foki ‘eni na’e ‘ikai lava hano tali mei he Pule’angá he ‘enau fakataha fakamatala ongoongó.

(52)

Facebook Comments