Akilisi Pohiva

KUO ui ko e “lea vale” pea mo e “takihala’i e kakai ‘o e fonuá”. Ko e ngaahi tefito’i lau ‘eni ‘oku ha’u mei ha kakai ako ‘oku nau fakaanga’i lahi ‘a e Palemia ‘o Tongá, ‘Akilisi Pohiva, ki he’ene lea ‘a ia na’e hiki vito, ‘o pehē ‘oku ne ‘ilo pe ‘e ia mo e Minisitā Polisi kae’uma’ā ‘a e Kapinetí ‘a e feitu’u ‘oku ha’u mei ai ’a e faito’o konatapu, ka ‘oku ‘ikai koaa kenau lava ‘o fai ha me’a ki ai.

   ‘Oku fakaloloma ‘a e lea ko ‘eni ‘a e Palemia, ‘a ia ‘oku ‘ikai ke ngata pe he’ene ‘ilo mo e Minisitā Polisi ki he feitu’u ‘oku ha’u mei ai ‘a e faito’o konatapú, kā ‘oku na toe ‘ilo ‘a kinautolu koee ‘oku nau tufaki ‘a e faito’o konatapú.

   Ko ‘ete ‘ilo pe ki he feitu’u ‘oku ha’u mei ai ‘a e faito’o konatapú, ko ‘ete ‘ilo ia kiate kinautolu ‘oku fetuku holo.

   Ko e hā ‘oku ‘ikai kenau lipooti ai ‘a e me’a ni ki he kau Polisí? Ko e hā ‘oku ‘ikai fai ai ha’ane fetu’utaki ki he Komisiona Polisi ke fakahā ki ai ‘a e me’a koee ‘oku na ‘ilo’i mo e Minisitā Polisi?

   Ko e faka’alika foki ‘eni ‘a e Palemia koe’uhí ko e vā ‘o ia, Minisitā Polisi, Kapinetí, mo e Komisiona Polisi he ko e Komisiona ‘oku fakafatongia’i ko e pule ngāue ki he kau Polisi, kae tautefito ki he ngaahi me’a ko ia ke fakatotolo’i. ‘A ia ‘oku nau fakafufū pē ‘a e ‘ilo ki he me’a ni ‘o ‘ikai fakahā ki he Komisiona Polisí na’a ne fai ha me’a ki ai.

   Lolotonga ko ‘ení ‘oku feinga e Palemiá ke to’o ‘a e mafai ‘o e Tu’i ki hono fakanofo ‘a e Komisiona Polisi, pea ‘oku kei fakatatali foki ‘a e tu’utu’uni mei he Tu’i fekau’aki mo ha toe fakaloloa atu ‘a e aleapau ‘a e Komisiona Polisi.

   ‘Oku pehē ‘e ha ngaahi fakamatala falala’anga na’e tuku atu ‘e he Tu’i ha faingamālie ki he Komisiona Polisi ke fai mai ha’ane tali ki he ngaahi tukuaki’i kuo fai ‘e he Minisitā Polisi kiate ia, ‘a ia ko ha ngaahi tukuaki’i ‘eni ‘o e Komisiona kuo ‘ave takai ki he mitia ‘o ‘ave kitu’a ki he kakai ta’efai ha ngāue he founga totonu kapau ‘oku ‘i ai ha launga mo’oni.

   ‘I ha tohi fefeka ‘o fakaanga’i ‘a e Palemia, na’e pehē ‘e he Palesiteni ‘o e PSA, Mele ‘Amanaki, “Ko e toki lea vale ‘eni mei ha Palemia ‘o ha fonua, kenau ‘ilo pe mo ‘ene Kapineti ‘a e feitu’u ‘oku ha’u mei ai e faito’o konatapú (ice) ka nau longo pe ‘o ‘ikai fai ha ngaue ki ai.”

   Na’e pehē ‘e Mele ‘Amanaki ke tala ki he kau Polisi he ko e feitu’u ia ke ‘ave ki ai ha fakamatala hia.

   “Ko ho’o mou longo Palemia ko ho’omou poupou’i ia ‘a e fefakatau’aki faito’o konatapú hotau ki’i fonua ni,” ko e lau ia ‘a Mele ‘Amanaki.

   Na’e toe fokotu’u foki ‘e Mele ‘i he’ene tohi ‘o pehe ki he Komisiona Polisi ke “puke atu e PM mo e Kapineti ‘o faka’eke ‘a e me’a ‘oku nau ‘iló, he ‘oku ‘ikai ha taha ‘e ma’olunga ange ‘i he Lao, he ko ‘ena kuo ne tala ‘oku nau ‘ilo e feitu’u ‘oku ha’u mei ai e drugs ka he’ikai tenau fai ha me’a ki ai.”

   ‘I he te’eki ai koee ke tali mai ‘e he Tu’i fekau’aki mo e aleapau ngāue ‘a e Komisiona Polisi, kuo fakahoko leva ‘e he Palemia ia ‘ene fakataha ‘o tukuatu ‘ene fakamatala fekau’aki mo e faito’o konatapu.

   ‘Oku mahino foki mei he’ene fakamatala na’e tukumai ‘oku hangē koee ha’ane fai faka’ita he ‘ikai kenau tokoni kinautolu ki he Komisiona Polisi ke fai ‘ene ngāue, kae’oua kuo to’o hono fili mei he Tu’i mo ‘ene kau fale’i, ‘o ‘oange kiate ia mo e Kapinetí.

   Ko e fehu’í foki pe ko e fai e lau ko ‘ení nai ko ha feinga ke faka’ita’i ‘a e kakai fekau’aki mo e me’a ni. Kuo ngāue angamaheni ‘aki foki ‘e he Palemia ‘a e loi kehekehe ke feinga’i ke fakangalivale’i kinautolu ‘oku ne taaufehi’a ki ai, pea ke faka’ita’i ai ‘a e kakai. ‘Oku ne pehē foki mo ‘ene kau poupou ‘oku poupouange ki ai ‘a e kakaí tatau aipe ko e hā e me’a ‘oku ne loto ki ai.

   Kā, ‘oku mahino ‘a e kalo’ulu ‘a e kakai tokolahi ki he fa’ahinga lea mo e fakamatala ko ‘eni ‘oku lau ki ai ‘a e Palemiá, he ko e mo’oní ‘e ala mo’ua ia ko e “kaunga hia” he’ene ‘ilo ki ha hia mo ha kau faihia, kae ‘ikai ke fie fai ha me’a ki ai.

   ‘Oku toe ‘i ai foki ‘a e kakai ‘oku nau toe fifili ki he me’a ni, he kapau ‘oku ‘ilo ‘e he Palemiá mo e Minisitā Polisi ki he kau fetuku faito’o konatapu kae ‘ikai fai ha me’a ki ai, ‘e ala fai nai hano tukuaki’i ‘o e Palemia mo e Minisitā ‘oku nau kaungā kau mo e kau tila ko ‘ení ki he fetuku faito’o konatapú?

   Ko e me’a foki ‘e tahá, pe na’e anga fēfē ‘ena ‘ilo ki he me’a ni, pea ko e hā e ngaahi fakamo’oni ‘oku na ma’ú? ‘E lava pe foki ko e lea ‘a e Palemiá hangē ko ‘ene ngaahi lea kehekehe kimu’a, ko e fo’i ‘aliaki pe ke fai ha valautu’u ai ‘o tataki ki ha me’a kehe kae tuku e poini mahu’ingá ia.

   Pea kuo tukumai foki ‘e he tangata loea ko Sione Fonua ha’ane fakamatala ‘a ia ‘oku ‘oatu he nusipepa ni, kau ai e fakaanga ki he founga fai ‘a e Palemia he lea he ngaahi me’a kehekehe ‘oku ‘ikai mo’oni pea ala takihala’i ai ‘a e kakai.

(88)

Facebook Comments