KUO tali ‘e he ‘Ene ‘Afió ‘a e fokotu’utu’u ‘o e kau Minisitā mo e Kapineti ne ‘oatu ‘e he Palemiá, ‘Akilisi Pohiva. Ko e Kapineti fo’oú ‘eni, ‘a ia ko e fili ia ‘e he Palemiá, ke hoko ko ‘ene timi ngāue, pea ken au pule’I ‘a e ngaahi potungāue kehekehe.

Palemia – ‘Akilisi Pohiva, Minisitā ki Muli, Minisitā Malu’í.

Tokoni Palemia – Semisi Sika, Minsitā Takimamatá, Minisitā Ngaahi Ngāue Lalahi.

Minisitā Pa’anga mo e Palaní – Pohiva Tu’i’onetoa.

Minisitā Ngoue, Vao ‘Akau, Me’atokoní, mo e Toutai – Semisi Fakahau.

Minisitā Ako – Penisimani Fifita.

Minisitā MEIDEEC – Poasi Tei.

Minisitā Ngaahi Ngāue Fakalotofonua mo e Sipoti – Akosita Lavulavu.

Minisitā Leipa mo e Fefakatau’aki – Tu’i Uata.

Minisitā Mo’uí; Ngaahi Pisinisi ‘a e Pule’angá – Dr. Saia Piukala.

MInisitā Fonua mo e Savea – Lord Ma’afu.

Minisitā Lao mo e Pilisone – Sione Vuna Fa’otusia.

Minisitā Polisi mo e Tamate Afi; Tānaki Pa’angá mo e Kasitomú – Mateni Tapueluelu.

   Ko e Palemia mo e Kapineti lolotongá ‘eni. Ko e Palemia foki na’e fili ‘e he Fale Alea, pea ne ikuna ai ‘e ‘Akilisi Pohiva, paloti ‘e 14, ki he paloti ‘e 12 ‘a Siaosi Sovaleni.

   ‘Oku fili leva ‘e he Palemia ‘ene kau Minisitā, ‘a ia ko e Kapineti ia ‘o e ‘aho ni, pea kuo faka’ofisiale ‘eni.

Ko e fili makehe ‘o Tu’i Uata

   Ko e fili makehe foki ‘o ha Minisitā na’e fili ia mei tu’a, he na’e ‘ikai ke fili ia ‘e he kakai ki he Fale Aleá. ‘Oku fakangofua ‘eni ‘e he Lao ke lava ‘e he Palemia ke ne fili ‘o a’u ki ha toko 4 mei tu’a ki he ‘Ene Kapineti. Pea ko e tafa’aki ‘eni na’e fili mai ai ‘e he Palemia ‘a Tu’i Uata ke ne hūmai ki he Kapinetí, pea hūmai ai pē foki ki he Fale Aleá.

   ‘Oku kau foki ‘eni he me’a ne fai ka ‘oku tu’u fehangahangai mo e ngaahi me’a ne fakahā kimu’a ‘e he Palemiá. Na’e ‘ikai ke loto ke ‘i ai ha taha ke ‘omai mei tu’a hangē ko ia na’e fai kia Clive Edwards mo ‘Ana Taufe’ulungaki he 2011 ‘i he Pule’anga ‘o Tu’ivakano. Na’a ne fa’a manuki’I ‘a e ongo Minisitā ko ‘ení ‘i he Fale Aleá, “he na’e ‘ikai ke fili mai kinaua ‘e he kakai.”

   Na’e pehē ‘e ‘Akilisi ‘oku mahu’inga ia ke fili ma’upe ki he Kapineti ha taha kuo fili mai ‘e he kakaí koe’uhí ko e taliui taupotu ia ko e taliui ki he kakaí. Kā, ‘i he’ene fili ‘a e Kapineti ko ‘ení, kuo liliu ai ke fili mai ha tokotaha, Tu’i Uata, ke hoko ko ha Minisitā, lolotonga iá ‘oku kei ‘i ai pe ‘a e toko 4 mei he’ene paatí na’e fili mai ‘e he kakaí ki he Fale Aleá, pea ‘oku ‘ikai hanau lakanga Minisitā.

   Ko e toko 4 ko ‘ení ko Mo’ale Finau, mo Veivosa Taka, ko e ongo fakafofonga mei Ha’apai; Losaline Ma’asi mei Tongatapu 5; pea mo Vatau Hui ko e fakafofonga mei he Ongo Niua. Ko e toko 4 ‘eni ha PTOA na’e fili mai ‘e he kakaí, kā ‘oku ‘ikai hanau lakanga Minisitā, kae fili mai ‘e he Palemia ia mei tu’a ‘a Tu’i Uata ke ne hoko ko e Minisitā?

   ‘Oku kau ‘eni he me’a kuo tokolahi e kakai ‘oku nau fehu’ia ‘a hono fili ‘o Tu’i Uata. Neongo ‘a ‘ene fakalao pe ki he Palemia ke ‘omai ha taha mei tu’a, pea neongo ko Tu’i Uata ko hono kaungame’a vivili, hangē pē mo ‘ene kaungāme’a vivili mo e tamai ‘a Tu’i Uata, ‘Uliti Uata.

   ‘Oku ‘i ai foki ha ni’ihi mei he loto’i PTOA ‘oku nau fakahā ‘a e ‘ikai kenau ofo ki he me’a ni, he ko Tu’i Uata mo Piveni Piukala, ko e ongo tangata fale’i ofi ia ‘a e Palemia ki he anga mo e founga ke fakalele’aki e Pule’angá. Ko e ongo tangata ‘eni ‘oku na fai e tataki ‘o e Palemiá.

   Kā, ko e hā e me’a makehe ke ‘omai ai ‘a Tu’i Uata, pea ko e hā ‘ene me’a te ne lava tautefito ki he Potungāue koee ‘oku ‘ave ia ki ai? Ko e anga ‘eni ‘o e fehu’ia lahi ‘oku fai fekau’aki mo e Minisitā fo’ou ko ‘ení.

   ‘Oku toe ‘i ai foki ‘a me’a ‘oku fehu’ia fekau’aki mo e tukuaki’i ‘o pehē ko Tu’i Uata mo ‘ene pisinisi ‘oku ‘i ai honau mo’ua lahi ki he Poate Taulangá, pea kau kinautolu he ‘ikai tauhi ki he tu’utu’uni ‘a e Paote Taulangá.

   Pea ‘oku te’eki ai pe foki ke ma’a ‘a e hingoa ‘o Tu’i Uata mei hono tukuaki’i ‘o e faka’ai’ai ‘o e 16/11, ‘a ia ‘oku kei ‘i ai e ngaahi tukuaki ki he’ene kau ki ai, kae tautefito ki he’ene taki he tafa’aki ‘a e kau Pisinisi Iiki ‘oku tukuaki’i na’a nau kau ki he 16/11.

   Manatu foki ko e fale koloa ‘o ‘Uliti Uata mo e Fale ‘o e Tokaikolo, ‘a e ongo fale ‘i loto kolo he Hala Taufa’ahau na’e ‘ikai ke ala ki ai ‘a e kau tutu ‘o e 16/11, koe’uhí ko Tu’i Uata mo Sangster Saulala, ko e ongo taki fakafepaki ia pea poupou ki he Temo he taimi ko ia. Ko e hisitolia ‘o e me’a ni ‘oku ‘ikai ke fufū, ka ‘oku kei fehu’ia pe ko e hā e me’a ne fai ki ai?

Faluku e mafai ke fakatahataha’i ki ha lotofale pe taha

Ko e fokotu’utu’u ‘a ‘Akilisi Pohiva ki he Pule’anga fo’oú ‘oku ne ‘omai ha toe fifili lahi pe ko e fai atu e feinga ke fakatahataha’i e mafai kiate ia, ‘e tuku fakakū? ‘Oku ‘ikai ke ne lava ke fakahoko lelei ‘a hono fatongia takí, kā ‘oku ne toe ‘oatu ‘a e Potungāue ‘e taha ke tānaki atu ki he’ene ongo potungāue na’a ne ‘osi ma’u pe kimu’a.

   Ko e Malu’í ‘eni kuo to’o ia ‘o toe tānaki atu ki ai. Ko e hā nai hono ‘uhingá?

   Ko ‘ene tu’u ko ‘ení, kuo ‘omai e sotia ia mo e ngaahi fatongia malu’í ki ai.

   ‘Oku toe fai foki ha tokanga he kuo ‘osi ma’u ‘e hono foha ‘i he fono, ‘a e lakanga Minisitā Polisí.

   Ko e ongo potungāue lalahi ‘eni koee fekau’aki mo e malu’i ‘o e Sosaieti Tongá, Sotia mo e Polisí, ‘oku nofo ia he nima ‘o e Palemia mo hono foha ‘i he fono. ‘Oku ‘ikai hano fehu’ia ‘o e Minisitā Polisi ‘a hono foha ‘i he fonó he ko ia pe he kau Temo ‘i Fale Aleá na’e polisi, pea ‘i ai ‘ene taukei he mala’e ko ia.

   ‘Oku nga’unu e Palemia ko ‘ení mo hono Pule’angá ki hono fakatahataha’i ha mafai lahi ‘i he Pule’angá ki ha lotofale pe ‘e taha.

   Ke faiange ha vakai ki heni: Ko e Palemia ko e Minisitā ia ki Muli (Foreign Affairs) pe ‘i he’ene pehē koi a ‘oku Minisitā ‘Imikuleisoni. Ko e ‘Imikuleisoni ‘oku ne pule’i ‘a e malu fehū’aki ki he fonuá (border control). Ko ‘eni ko ia ‘oku ne pule’i ‘a e Malu’í. Pea ‘i he lotofale tatau ‘oku pule mai hono foha ‘i he fono he Polisi, pea mo e tamai he Pilisone. Pea ‘oku toe ‘oatu foki mo e Kasitomú ki he foha he fono.

   Ko e fu’u mafai lahi faka’ulia ‘eni ‘oku ‘i he lotofale pe ‘e taha. Pea ko e mafai ko ‘ení ‘oku kau ki ai ‘a e malu (security) ‘o e fonuá.

   ‘I he ngaahi ta’u 1980 tupu ‘o fai mai ai ki he 2010, ko e taha e tefito’i fakaanga ‘a ‘Akilisi Pohiva ki he Tu’í mo e Pule’anga ko ia, ko ‘ene pehē ‘oku fu’u lahi ‘a e mafai ‘oku ‘i he ‘aofinima ‘o e Tu’i, pea kuo taimi ke vahevahe mai ‘a e mafai ko ia ki he kakaí. Na’e a’u ki he ‘ene pehē ko e Tu’i ‘o Tonga he Konisitutone te’eki ke liliú, ‘oku pule fakaleveleva (absolute power), pea kuopau ke fakasi’isi’I ‘eni.

   Sai, ‘i he a’u mai ki he 2010 ne fai ai e ngaahi liliu ke toe fakatemokalatiange ‘a Tonga ni, pea ko e vahevahe mai koee ‘o e mafai ‘o e Tu’í, ko e fakataumu’a ke ‘oua na’a toe nofotaha e mafai ‘i ha tokotaha pe, pe ko ha famili kae vahevahe ke lava ke palanisi ‘a e ngaahi mafai, ‘a ia koee na’e hoko he liliu ‘o e 2010.

   ‘Ave mafai ki he fili e Palemia ki he Fale Aleá, ‘oange mafai ki he fili e kau Minisitā ki he Palemia, kei tauhi pe ‘e he Tu’i ‘a e ngaahi mafai ‘e ni’ihi, kau ai ‘a e Pule Taupotú. Tau’atāina ‘a e Fakamaau’angá, pehē ki he Komisiona Polisi, mo e ‘Ateni Senialá. Pea lava heni ke palanisi e mafai ke ‘oua ‘e fakapolitikale’i kae lele lelei ‘a e langa ‘o Tongá, pea fevahevahe lelei ‘a e ngaahi mafai ko ‘ení honau takitaha fatongia, ke fakahoko ai ‘a e pule lelei.

   Kae, talu ‘a e fili ‘o e ‘Akilisi ke hoko ko e Palemia mei he ta’u ‘e tolu kimu’a, mo ‘ene kei feinga pe ke fakatahataha’i ange ‘a e mafai ki ai ko e Palemia mo hono Pule’angá. Pea ko ‘eni ‘i he fokotu’utu’u Kapineti ko ‘ení, ‘oku fu’u mata’ā’ā mo’oni ‘a e feinga ke falute ‘a e mafai ‘i ai mo hono falé.

   Pea ko e nopele pe ‘oku ne fakakau mai ki hono Pule’angá, ko e nople ko hono famili toto, pea ko ia ai ‘a e matu’aki ‘ilonga mo’oni ‘a e ha’i mai ‘o e ngaahi mafai pule ‘o e fonua ki ha tokotaha mo hono ki’i famili.

   Ko e me’a ‘eni koee na’e fa’a fakaanga’i mo feinga ‘a ‘Akilisi mo ‘ene kau poupou ke liliu, kuo ne fai ia ‘e ia ta’etoe fehu’ia.

Ko e kau poupou ko e sio’ata ia ‘o e ‘atamai ‘o e Palemiá

Kapau leva ‘oku te fie ‘ilo ki he ‘atamai ‘o ha taki mo ‘ene founga ngāué, ko e me’a ke te fai ko e vakai ki he founga ngāue mo e to’onga ‘a ‘ene kau poupoú. Ko e hā pe me’a ‘oku teke ‘e he kau poupou, mo ‘enau to’onga mo’ui, ko e me’a ia ‘oku ‘i he ‘atamai mo e loto ‘o e taki ko ia. He kapau ‘oku hala ‘eni te ne fakahā pea te ne feinga ke ta’ofi.

   Talu pe mei mu’a mo e hoko ‘a e me’a ko ‘ení ‘i Tonga ni he kamata mai ‘o e taki ‘a ‘Akilisi Pohiva he feinga liliu. ‘I he kamata mai na’e ‘i ai hono kau poupou, pea ‘i he ‘asi mai ‘a e ngaahi taumu’a hala ne fai ki ai ‘a e feinga liliú, ne mavahe ‘a e kau poupou ia ko ia.

   Ko e mo’oní ne hoko atu ‘a e kau poupou he taumu’a taau, kae mavahe ‘a ‘Akilisi Pohiva ia ki he taumu’a kehe. Pea ‘i he ‘aho ni ‘oku tau vakai ki he kau poupou ‘o e ‘aho ni, ko e tokolahitaha ko e kau poupou ‘oku nau fakahoko pe me’a ‘oku tui ki ai mo taki ki ai. Ko e ‘atamai pe ‘o ‘Akilisi Pohiva ‘oku nau ngāue’aki.

   ‘Oku ‘i ai ‘a e hoha’a ki he ngāue’aki ‘e he kau poupou ‘a e to’onga tā, fakaaoao, fakamamahi, fakatikitato he ko e me’a pe ia ‘i he ‘atamai mo e loto ‘o e Palemia. Pea na’e kamata mahino mai pe ‘eni mei he 16/11. Ko e tutu ‘o Nuku’alofa na’e fai ‘e he kakai pe ko e kau poupou na’e taki ai ‘a ‘Akilisi Pohiva, ko e Palemia ‘o e ‘aho ni.

   ‘Oku fai ha lea kovi mo kapekape ki he Tu’i mo hono falé, kae’uma’ā ‘a e hou’eiki ‘o e fonuá. ‘Oku ‘ikai ko ha fakafekihi ha poini, ka ko e kape mo e ‘ulungaanga ta’efaka’apa’apa mo taaufehi’a ‘oku fai he ngaahi mitia fakasosiale mei he kau poupou ‘o e Palemia.

   Na’e fai hano taa’i ha matapule ‘e he kau poupou koe’uhí ko ‘ene lea koaa ‘o pole’i a e Palemia. ‘Oku te’eki ke mahino pe ko e hā e me’a kuo fai fakalao ki he me’a ni.

   Kā, ko e poiní, ko e ngaahi me’a koee ‘oku hā mai mei he kau poupou ‘o e Palemia, ‘oku fakatu’utāmaki lahi ki he fonua ni, pea ‘oku hangē ha sio’ata ‘oku ne fakahā mai ‘a e ‘atamai mo e loto ‘o e takí ni.

   Ko e hā nai ‘oku ‘ikai ke lea mai ai ‘a e Palemia ‘o ‘uluaki fai hono fakatonutonu ‘o ‘ene kau poupou, ke ta’ofi ‘a e tā fakamamahí mo e ‘ulungaanga ta’efaka’apa’apá?

   Ko e hā ‘oku fakalongolongo aipē ‘a e Palemia he ngaahi me’a ‘oku fai ta’etaau ‘e hono kaungā ngāue mo e kau poupou kiate ia? Ko e hā ‘oku sai aipē ‘a e kākā ia mo e ta’efaitotonu ‘ene kau poupou, kae kovi ‘a e me’a tatau ‘ou fai ‘e he kau ta’epoupou?

   Ko e kamata ko ‘eni ‘o e 2018 mo e Pule’anga fo’oú ‘oku lōlahi hono ngaahi pole mo e ngaahi palopalemá, pea he ‘ikai lava ‘e he Pule’anga ko ‘ení ke matu’uaki e faingata’ā kapau ‘e kei lele tatau aipē ke toe koviange ‘a e fai fatongia ‘o hangē ko e ta’u ‘e 3 kuohilí.

(18)

Facebook Comments