Na’e ha’elea He’ena ‘Afifio Kingi Tupou VI pea mo Kuini Nanasipau’u ‘i he Tokonaki ‘o e uike kuo ‘osi ‘a e polokalama ‘a’ahi ‘o e ngaahi matanga na’e faka’ilonga’i ‘i hona tofi’a ‘e hona kainga mei Lomaiviti, Kahoua pea mo Pea.

‘I he Sapate na’e malanga huufi ai ‘a e Katoanga Kainga ‘o Lavaka pea na’e ‘afio ai ‘a ‘Ena ‘Afifio ‘i he ‘api ko Ma’ananga ‘i he Siasi Katolika Loma ‘o Pea.

‘I he ha’elea ‘o e ngaahi matanga na’e fokotu’u ai ‘e he kainga ‘o Lavaka ‘a e ngaahi papa ‘o e matanga fo’ou ‘e 10 ‘o tanaki atu ki he ngaahi matanga mo e ngaahi matapa ‘o e kolotau ko Pea ‘a ia na’e fakahoko ‘i he Pea Week ‘o e 2016.

Ko e ngaahi matanga fo’ou na’e faka’ilonga’i ko e 2 ‘i Kahoua ‘a ia ko e Vai ko Ha’apele pehe ki he Kahoua. Ko e matanga ‘i Lomaiviti ko e Talivulangi pea ‘i Pea ko e Sia ko Ha’aloka, Vai ko Ha’ahao, Toa ‘Afio’anga, Ma’ananga, Fakakanotangata, Fakaveleatenge pehe ki Afekaeso.

Hange ko ia ‘oku toka mea’i pea lau’ilo ki ai ‘a e kakai ‘o e fonua ‘oku kau ‘a e tofi’a ‘o Lavaka ‘i Pea he ngaahi tofi’a lalahi ‘o e hou’eiki nopele ‘o Ha’a Havea Lahi ‘a ia ‘oku ne katoi mei Pea ‘o lele mei ai a’u ki Kahoua.

‘Oku fonu mahuohua ‘a e ngaahi feitu’u ni he ngaahi matanga kuo mole ‘a ia ‘oku fiema’u ke faka’ilonga’i koe’uhi na’a molia atu ‘i he ngaahi ta’au ‘o e ngaahi fakafe’atungia mei natula pea pehe ki he ngaahi uesia ‘i hono teke pehe ki hono holoki koe’uhi ko e ngaahi langa mo e ngaahi ‘uhinga kehe pe.

‘Oku hounga’ia pea monu’ia ‘a e To’utupu Tavahikena koe’uhi ko e tokoni ‘a e Potungaue Takimamata ‘o malava ai ke pulusi mo fokotu’u ‘a e ngaahi papa ko ‘eni.

‘I he to folofola ‘a ‘Ene ‘Afio na’a ne folofola ai ‘o hange ko e talatalaifale ‘a e tamai ki he’ene fanau. Na’e tokaki ‘a ‘ene fakakoloa ‘a hono kainga ki he muiaki ‘a e visone ‘oku ne toutou folofola’aki ‘a e mahu’inga ‘o e ako, mo’ui lelei pea pehe ki he visone ma’a e kaha’u.

Ko e malanga fakakoloa ‘o e ‘aho na’e fakahoko ia ‘e Patele Vehikite ‘one fakamanatua mai ‘a e maama ‘o Sesu ‘a ia na’e fekumi kiai ‘a e kau poto pea na’e maamangia ai ‘a e loto ‘o e po’ulia. ‘One fakamalo’ia ‘a e langimama’o ‘a e Tama ko Lavaka hono fatu ‘a e katoanga ni ‘one fa’utaha ‘a hono kainga pea ‘omi ‘a e visone langimama’o ko ‘eni ko e tuhulu ke tulikaki ki ai ‘a hono kainga.

‘Oku hokohoko atu ‘a e polokalama ko ‘eni ‘o toki faka’osi ki he Sapate ‘a ia ‘oku ‘i ai ‘a e ngaahi polokalama ki he manatu melie ‘a e kau toulekeleka pea kau ki ai mo e fe’auhi faiva pea mo e hiva ke paotoloaki ‘a hono tauhi pea pukepuke ‘a ‘etau taufatungamotu’a koe’uhi ke ‘oua ‘e molia.

Ko e hiva na’a ne ikuna ko e fa’u ‘a Mulikiha’amea Kupu mei he Matapa ko Nakau pea ikuna ‘e he kauhala Tauvu Ki Ma’ananga ‘a e faiva mo e tau’olunga kae ua ‘a e Matapa ko Nakau.

Ko e taumu’a ‘o e polokalama ni ke fai ‘a hono fakatahataha’i ‘o e kainga ‘o foua ‘a e hala fononga ‘o e ngaue fakataha.

(14)

Facebook Comments