FALE ALEA ‘O TONGA

Ko e kaveinga lahi ‘o e ‘uluaki ‘aho ‘o e Fale Aleá, he uike kuo ‘osí, tukukehe ‘a e ngaahi fakafuakava’í, mo ha ngaahi me’a kehe pe, ko e tu’unga ‘oku ‘i ai ‘a e mo’ui lelei ‘a e ‘Eiki Palemiá, ‘Akilisi Pohiva.

   Na’e lava lelei mai pe ‘a e Palemia mei he Falemahaki Vaiolá ki he ‘uluaki fakataha ko ‘eni ‘o e Fale Alea, pea fai foki mo hono fakafuakava’i.

   Na’e ‘uluaki ‘ohake ‘a e tu’unga mo’ui lelei ‘o e Palemiá ‘e he fakafofonga ‘o e kakai mei ‘Eua, Tevita Lavemaau, ‘o ne pehē ‘oku ‘i ai ‘a e tokanga makehe ki he tu’unga ‘oku ‘i ai ‘a e mo’ui lelei ‘a e Palemia, pea ke ‘omai mu’a ha lipooti ke ‘ilo ki ai ‘a e kakai ‘o e fonuá.

   Na’e poupou ki ai ‘a e fakafofonga Fika 15 ‘o Vava’ú, Samiu Vaipulu.

   Pea na’e toe fai foki ha fakamalanga ‘a e fakafofonga nopele fika 1 ‘o Vava’ú, Lord Tu’ilakepa.

   “Kapau ‘oku ‘i ai ha tengetange, ko e hā hono kovi ke mea’i ‘e he kakai ‘o e fonua ni pea mo e Fale ni, ‘a e tu’unga ‘oku ‘i ai hotau ‘Eiki Palemiá? ‘Eiki Sea, ‘oku ke me’a ki hē, ‘oku attend ‘a e kau toketā mei tu’a, koe’uhí ‘oku mahino mai ‘oku fakalakalaka ka ‘oku ta’epau ‘a e tu’unga ‘oku ‘i ai ‘a e Palemiá?” ko e Tu’ilakepa ia.

   Na’a ne hoko atu ‘o pehē: “Minisitā Mo’ui ke ke lipooti ki he kakaí ko e hā e tu’unga ‘oku ‘i ai kapau ‘oku kanisa, ‘ai ke mahino…”

   ‘I he taimi ko ‘ení na’e me’a hake ai ‘a e Minisitā Polisí, Mateni Tapueluelu ko ‘ene fakatonutonu.

   “Ko e me’a ko ‘ení ‘oku pehē ‘oku ha’u mei he kau toketā ‘oku ta’epau, ko e toketā pē tene talamai ‘a e fo’i lea ko iá… ko e fakaakeake na’e fakahoko mai ‘e he ‘Eiki Minisita, ko e faka’aluma ‘oku pehē ‘oku kanisā… fakatonutonu atu Sea ‘oku hala,” ko e lea ia ‘a e Minisitā Polisí.

   ‘Oku fai foki ha falala ki he me’a ‘oku tukumai ‘e he Minisitā Polisi, he ko e foha ia ‘i he fono ‘o e Palemiá, pea kapau ‘oku kanisa ‘a e Palemiá, pea ‘oku pau ‘oku ‘ilo ki ai ‘a e famili tonú, tukukehe kapau ‘oku nau feinga ke ‘ufi’ufi ‘eni pea ‘ave hala’i kitu’a.

   Ko e fakamatala foki na’e ‘omai ‘e he Minisitā Mo’ui, Dr Saia Piukala ki he Fale Alea, na’a ne pehē ‘oku ‘i ai ‘a e ngaahi me’a ia ‘oku fakapulipuli (confidential) he tu’unga ‘o ha mahaki pea mo e kau toketa fakafaito’o. Pea ‘oku ‘ikai ke tonu faka’efika ia ke ‘ave ‘a e fakaikiiki ki tu’a.

   “Sea, ko e hoha’a ko ‘eni… ko e ‘ai pe ke fakahoko atu na’e tengetange ‘a e ‘Eiki Palemia, pea kapau ‘oku ‘i ai ha taha ‘oku tengetange ‘oku ‘i ai ‘a e recovering period (taimi fakaakeake) ki he tokotaha ko ia ke ake ‘oku ‘i he tu’unga fakafiemalie ‘oku fakalakalaka kimu’a. Ko e ngaahi me’a pe ia teu lava ‘o tukuatu Sea, neongo ko e ‘Eiki Palemia he ‘oku ‘i ai ‘a e me’a ‘i he faka’efika ‘i he me’a ko ‘ení he ‘ikai ke tau lava tautolu ‘o disclose pe te tau hanga ‘o tukumai ‘a e detail fekau’aki mo ha fokoutua ha taha, pe ko ha tokotaha pe ko ha mahaki he Falemahaki Vaiola…,” ko e Minisitā Mo’ui ia.

Tokanga ki he Kupu 53

Ko e taha e me’a na’e fai ki ai ha tokanga, pea na’e ‘ohake ‘eni ‘e he fakafofonga ‘o Vava’u Fika 15, Samiu Vaipulu, ‘oku fekau’aki ia mo e Kupu 53.

   Ko e kupu ‘eni ‘oku fakahā ai ‘a e fiema’u ki he Minisitā Pa’anga ke ne ‘omai ha’ane fakamatala pa’anga ki he Falé he’ene avá pē “koe’uhi ko e pa’anga na’e fakamoleki mo e pa’anga na’e hūmai ‘i he vaha’a taimi ko ‘ení.”

   Kā, na’e tukuatu ha fakamatala ia mei he Sea, fekau’aki mo e Minisitā Pa’anga, Pohiva Tu’i’onetoa, na’e ‘omai ‘ene poaki ki he’ene folau fakafaito’o, uike ‘e ua ki ‘Aositelelia, pea ‘e fakahoko e fatongia ko ia ki he Falé ha’ane foki mai.

   Na’a ne pehē foki ko e fakaikiiki ‘o e me’a ni fakatatau ki he Kupu 53, ‘oku toki lava ke ‘ai ha taimi ke ‘omai ai ‘a e lipooti ko ‘eni, ka ‘oku ‘ikai ko e ‘uluaki ‘aho pe ‘o e Fale Aleá.

Ko e fili ‘o e Sea ki he Komiti Kakató

Na’e fai foki hano fokotu’u mai ‘o e fakafofonga fika 13 ‘o Ha’apai, Veivosa Taka, ke ne hoko ko e Sea ‘o e Komiti Kakato. Na’e fokotu’u mai foki mo Siaosi Sovaleni, ‘o Tongatapu 3, pehē kia Losaline Ma’asi ‘o Tongatapu 5, ki he Sea ‘o e Komiti Kakato, ka na’e ‘ikai kena tali. Na’a na holomui.

   Na’e fokotu’u foki mo e fakafofonga mei Niua 17, Vatau Hui, ki he lakanga Sea ‘o e Komiti Kakato, ka na’e ‘ikai te ne tali. Na’a ne toe fokotu’u mai pe ke Sea pe ‘a e Sea ‘o e Komiti Kakato mei he ta’u kuo ‘osí.

   ‘Oku mahino foki mei ha fakamalanga ‘I he Fale Alea, ko e tokotaha pe na’e loto mo fai ki ai ‘a e fokotu’u ‘a kinautolu mei he PTOA, ‘a ia ko e fakafofonga fika 13 ‘o Ha’apai.

   Ko ia ai na’e toe fili ‘a e Sea ‘o e Komiti Kakató mei he ta’u kuo ‘osí, Veivosa Taka, ke ne hoko atu pe ko e Sea he fa’ahita’u Fale Alea ko ‘ení.

Fakafuakava’i ‘o e kau memipa mo e houe’iki Minisitā

Ko e ouau mamafa foki ‘o e ‘uluaki ‘aho ‘o e Fale Alea, ko hono fakafukava’i ‘o e Sea ‘o e Fale Aleá, Lord Fakafanua, mo e hou’eiki memipa ‘o e Falé.

   Na’e fai foki mo hano fakafuakava’i ‘o e ‘Eiki Palemia, ‘Akilisi Pohiva, mo e hou’eiki Minisitā, tukukehe pe foki ‘a e Minisitā Pa’angá, Pohiva Tu’i’onetoa, ‘a ia na’a ne poaki ko e folau fakafaito’o ki ‘Aositelelia.

   Kaekehe, ne lava kakato ‘a e fakafuakava’i ‘o e Hou’eiki memipa ‘o e Fale Alea, pehē ki he Palemia mo ‘ene kau Minisitā, kae’uma’ā foki ‘a e Sea ‘o e Fale Alea, pehē ki he Sea ‘o e Komiti Kakató.

   Ko e ‘uluaki ‘aho ia ‘o e fakataha Fale Alea ‘o e 2018. Pea neongo ‘a e kei tengetange ‘a e Palemia, mo e taimi fakaakeake ‘oku ne foua ai, kā ‘oku fakalakalaka pe kimu’a, fakatatau ki he fakahā ‘a e Minisitā Mo’uí, pea kuo lava ‘a e ngaahi ouau fakafuakava’i ‘o e ‘uluaki ‘aho ‘o e Fale Alea ki he 2018.

(87)

Facebook Comments