Princess Latufuipeka

Tapu mo e ‘Afio ‘a e Tolu taha’i ‘Otuá ‘i hotau lotolotongá he fale tapu ni

Tapu mo ‘Ene ‘Afió Tupou VI ka ko Lavaka pea mo e Ta’ahine Kuiní Nanasipau’u

Tapu mo Faifekau Siosiua Tau’ataina mo Ha’a Taki Lotu

Fakatapu mo Taumoepenu, Kopano-ki-he-‘Eiki mo Ha’a Matāpule

Fakatapu ki he Kāinga kotoa ‘a Lavaka ‘oku tau lōnuku ‘i Sa Paula he efiafi ni

Fakatapu kia kimoutolu ‘oku tau kau fakataha he ngalu ‘eá, ‘ata mo e opé

Fakatapu ki he Kōmitiē kae ‘uma’a ‘a e To’utupu Tavahikená, kae ‘atā mo au e faingamālie ko ení ke fai ha fakamālō ‘i hoku tu’unga ko e Pataloni e To’utupu Tavahikená.

‘Oku ou toumu’a tuku ha fakafeta’i ki he ‘Eikí ka ko e Tokaima’ananga mo e Aoniu ‘o e ‘univeesi ko ení, ‘i he’ene taulamahao pea ne fakafonu tāpuaki mo e kelesi ‘etau kātoangá ‘o tau a’usia ai ‘a e faka’osinga ‘o e Uike e Kāinga ‘o Lavaká 2018.  Fakafeta’i ‘oku ‘i vaka ‘a Sātai pea mo’oni ai ‘a e 2 Kalonikali 15:7 Ka ko kimoutolu mou mālohi pē ‘o ‘oua te mou fakalouhi’i mofisi ‘e ai ha totongi ki homou fita’á.  Ke ‘iate ia ‘a e langilangi kotoa ‘o e kātoanga ni.

‘Oku ‘i ai e loto hounga’ia mo’oni koe’uhí ko e hā’elea he ‘Ena ‘Afifió Tupou VI ka ko Lavaka mo Kuini Nanasaipau’u e kātoanga ni, pea toe hiliō ka ko homau fakahinohinó – ketau tokanga ki he mo’ui lelei fakaesinó kae lava ke fai ha tokanga ki he akó mo lau ‘a e tohi ‘a Palōvepí vahe 1 ki he 7.  ‘Oku tatau nai mo e hā ‘a e pata he lā kuo tu’u ho’omo kāinga ‘i ho’omo hā’elea e Kaho’euá, Vaikeli ‘o Sēkopé mo e Vai ko Puná ko e ola ‘a e sika ‘a Afu’alo mo Kaukauloá.

Fakamālō atu ki he ngaahi poupou kotoa meia Hou’eiki, Ha’a Lotu, Ha’a Tauhifonua mo Ha’a Matāpule, ‘Ofisa koló, Kōsilio fakakolo, kau taki Kauhalá kae ‘uma’a e ngaahi kupu fekau’aki kotoa pē.

Fakamālō atu ki he kau Siponisā hono kotoa, mei he potungāue, pisinisi mo e kāingá fakataau taha ‘i homou tuku taimi ka mou manatua mai e Uike e Kāinga ‘o Lavaká ‘i he ‘ofa mo e tokoni kotokotoa:

Potungāue Takimamata

Tonga Power Limited

Tano’a International Dateline Hotel

Friendly Island Bookshop

BSP Bank

Adiloa Store

Costlow

Cabella

Waste Authority Limited

Molisi Tonga

Ngutulei Bar and Restaurant

TCC

FM 87.5 mo e ngaahi kautaha ongoongo ‘i he fakamafola ‘ata mo e lea

Kōmiti Vai ko Puna, San Francisco ‘Amelika

Sela Piutau, Fusikaunanga & Kenny Brauer, Makapuna ‘o Palutea mo Palenapa – Pulisipeini ‘Aositelelia

Maikolo mo ‘Ofa Tupou mei Sene ‘Aositelelia

Kalapu Nainusi mei Sene ‘Aositelelia

‘Anau Lavaki mei Sene ‘Aositelelia

Makapuna ‘o Taufa’ao mei Kenipela ‘Aositelelia

Fānau mo e makapuna ‘o Tevita Matoto mei ‘Aositelelia

Fānau mo e makapuna ‘o Siaosi Leger mei San Francisco ‘Amelika

Fānau mo e makapuna ‘o Pita Kengike mei San Francisco ‘Amelika

Fānau mo e makapuna ‘o Fa’aui mo Kulukona Taumoepenu mei Hawaii ‘Amelika

Paula Moimoi Lātū

Pasemata, Kali Taunisila mo e fāmili

Fāmili ‘o Sisi mo Kefu Lakai

‘Oupei Tupou & Talau Moeakiola

Komiti Tavahikena ‘a Lomaiviti mo Kahoua

Kau Villa

Pita Taumoepenu

Dr Mary Ruth & Tu’ikolongahau Toumu’a mo e fāmili

Vika Tapueluelukihetau

Nishi Trading mo

Saia Moehau.

Fakamālō atu ki he Mātu’á mo e Tauhi Fānau kotoa pe ‘a e To’utupu Tavahikená homou ngaahi poupou, tapou mo e akonaki ki he kātoanga ni.  Fakafeta’i hono fakatupu ha ngaahi tenga lelei mo ‘aonga ma’ae kaha’u hotau fonuá.

Fakamālō atu ki he Kōmití kae ‘uma’a ‘a e To’utupu Tavahikena he ngaahi fokotu’utu’u polokalama, fetu’utaki mo hono ngāue’i e ngaahi polokalama ‘o e Uike e Kainga ‘o Lavaká.  ‘Oku mahino ko e me’a fo’ou hono fakaivia kimoutolu ko e to’utupu kemou ngaue’i hotau ngaahi koló ki hotau tukuingatá, ‘o hangē ko homou kau mai ki he ngaahi polokalama ni mo hono faka’ilonga’i mo hiki tohi hotau hisitōlia fakakoló.  Kamou vakai hake pē ki he fu’u ivi ‘o e ngāue fakatahá, ko e ngaahi me’a lahi fau ne malava koe’uhí pē ko homou lototō ketau ngāue fakatahá.  Ko e ngaahi me’a eni ‘e ni’ihi ‘oku hā ai e ngāue fakatahá: ‘oku ma’a pea fakaholosio’anga e koló mo hono teuteú ‘o mahino ai ko e ngāue ki aí ne palani pea hokohoko lelei; ‘oku maau e teuteu e to’utupú honau lanu, teunga, faiva mo e me’atokoni; ‘oku fetokoni’aki honau kauhalá ki he ngaahi fatongia ‘oku vahe atú pea nau fiefia ai;  ko e ngāue lahi e fetu’utakí mo e femahino’akí ka ‘oku tau nofo he peesi tatau kotoa fakatatau ki he taumu’á; pea ‘oku hā mai ko e kakai nofo melino mo fe’ofo’ofani.  Ko e ngaahi sipinga lelei eni ‘oku hāsino mai he mo’ui ‘a e Tavahikená ko e ngaahi tenga lelei ne tō pea fakatupu he Kainga ‘o Lavaká pea ‘e ‘iloa ai e Tavahikenai ha tapa pe ‘o maamani tenau ‘i ai ‘oku ‘ilonga e mata ‘enau ki’i pení mo e ngaue honau nimá.

Tokua ne fai e fakataha ‘a e fanga kumā́.  ‘Oku lau na’e mamahi ‘a e fanga kumaá ‘i hono fa’a tuli kinautolu ‘e he pusí (hufanga he fakatapu), ‘o nau tu’utu’uni ke fai ha fakataha, kenau alea pe ko e hā ha me’a ‘e lava ai ke ta’ofi.  Na’e lahi ‘a e fakakaukau na’a nau lau ki aí kae ‘ikai sia’a, kae ‘iloange na’e lea ha kumaa mui, kenau tautau mu’a ha ki’i fafangu ‘i he kia ‘o e pusí, ke ‘ilonga ai ‘ene ha’ú ka nau hola.  Na’e mālie’ia ‘a e fakatahá ‘i he lea ko ení, ‘o nau tu’utu’uni ke fakahoko.  Pea toki lea mai ha motu’a kumā́ ‘o ne pehē, “Mālō si’i fakakaukau ‘a e matāpule na, pea ka fai ‘e ‘aonga ‘aupito.  Ka ‘oku ‘i ai ha’aku ki’i fehu’i, pe ko hai te ne tautau ‘a e fafangú ‘i he pusi?” Kāinga ‘o Lavaka, ko e me’a faingofua ketau mohu fakakaukau ka ko hono fakahoko e ngaahi fakakaukau leleí ‘oku ‘a taua pē ia – ke tauhi hotau koló ke ma’a mo faka’ofo’ofa, ketau fakaivia ‘a e Tavahikená mo poupou ki henau ngāué, ke tau tokanga ‘o fakamalohisino ketau mo’ui lelei, ketau teke e Tavahikená kenau tokanga ki he akó.  To’utupu Tavahikena ‘o Lomaiviti, Kahoua mo Pea, Mātu’a mo e kau Tauhi fānau he ‘ikai lava ketau nga’unu lelei kimu’a ‘i he feinga ke a’usia e vīsone ‘a Lavaká ma’ae Tavahikená ka ne ta’e’oua homo’ou hufia ‘etau katoanga, ‘ofa mo e tokoni maí.  Kapau te tau loto ketau fononga ki he kaha’u vave maí ‘i ha founga ‘oku vave – ko e olá ko ‘e te fononga tokotaha.  Pea kapau te tau loto ketau fononga ki he kaha’u vave maí ketau ō mama’o – ko e olá kuopau ketau fononga fakataha kotoa.

Fakatauange ne ‘aonga e ngaahi lēsoni ne tau ‘inasi ai mei he polokalama e Uike e Kāinga ‘o Lavaká kiate kimoutolu hono kotoa.  ‘Ofa kemou ma’u ha ta’u fo’ou mohu tāpuekina mo fonu he melino mo e kelesi faifio ‘a e ‘Otuá.

‘Ofa atu

(9)

Facebook Comments