‘Oku mahino ‘a e faingata’a fakasino ‘oku ala foua ai ha taha he taimi ‘oku hoko mai ai ha fakatu’utāmaki fakaenatula, hangē ko ia na’e hoko he tōmai ‘a Saikolone Gita.

‘Alu foki e tokangá ki he maumau lahi kuo hoko ki he ngaahi fale mo e ngaahi ‘akau ‘o natulá, pea toe tokolahi fau e ngaahi famili kuo nofo hufanga koe’uhí ko e maumau kuo hokó.

‘Oku ‘i ai ‘a e monū’ia lahi he ‘ikai ha mo’ui ‘e mole he saikoloné, pea toe si’isi’i fau ha lavea mei he matangí.

‘Oku kei talanoa pe foki ‘a e mātu’a, kapau na’e tō ‘aho mai ‘a e matangí, mahalo ‘e lahi e lavelavea, pea ‘e ala ‘i ai ha ngaahi mo’ui ‘e mole. Koe’uhí ko e hoko mai he po’ulí na’e nofo ai e kakai ‘i fale, pea si’isi’i ha ‘alu kitu’a ‘o mei lavea he holo ‘a e ‘akau mo e ngaahi falé, kae’uma’ā ‘a e kapa ‘ato mo e ngaahi veve lalahi na’e puhi holo ‘e he matangí.

‘Oku lolotonga fai ‘a e ngāue lahi ki hono fakaakeake ‘a Tonga ni mei he saikolone, mo e maumau lahi na’e fakahokó. Kā, ‘oku matu’aki mahu’inga ia ke fai ha fakakaukau’i mo ha ngāue ki he lavea mo e mamahi fakaeloto mo faka’atamai ne hoko ki he kakai ‘o Tongatapu mo ‘Eua koe’uhí ko Saikolone Gita.

Ko e lavea koee ‘oku hoko ki he ongó mo e ‘atamai ‘oku ‘ikai fa’a sio leva ha taha ki ai, pea ko e taimi lahi ‘oku hoko ia pea toloi ‘a e maumau ‘oku hoko mai ki ha taha.

Ko e tu’unga ‘o e lavea faka’atamai mo e lotó kuo hoko ki he fu’u kakai ‘o Tongatapu mo ‘Eua, ko e lavea ‘oku lahilahi. Pea ‘oku ‘i ai ‘a kinautolu ‘oku nau lava ke matu’uaki pea nau ake mei ai ‘o hoko atu e mo’uí, kā ‘oku ‘i ai foki mo kinautolu ‘oku faingata’a ke ake mei he lavea ‘o e lotó mo e puputu’u kae’uma’ā ‘a e ha’aha’a ‘oku hoko ko e lotomo’ua.

Ko e fakatu’utāmaki ne tō mai ki he motu ‘oku tokolahitaha ai ‘a e nofó, ‘oku ‘ikai ke ta’e’iai ha uesia tamaki ai ‘a e fakakaukau, ‘a e lotó mo e ongó, pea ‘oku fiema’u ia ke fai ha ngāue ki ai, ke faito’o mo fakalelei’i.

‘Oku ‘i ai ‘a kinautolu ‘oku nau ongo’i ‘a e mole, pea ‘ikai kenau ma’u e nonga mo e fiefia ne nau ‘inasi ai kimu’a. Kuo hoko ‘a e fakatamaki, pea ko e me’a ‘oku ‘inasi ai ‘a e fakakaukau, ‘a e lotó, mo e ongó, ko e mamahi mo e fehu’ia lahi e ‘uhinga ne hoko mai ai e mamahi ko ‘ení.

Ko e mamahí ko e me’a ia ‘oku ‘inasi ai ‘a e tokotaha kotoa pē. Pea ‘oku ‘i ai ‘a e ni’ihi ‘oku lahiange ‘enau mamahí he ni’ihi kehe, ‘o fakatatau pe ki he me’a na’e hoko kiate kinautolú.

Pea ko e me’a fakanatula pe foki ko e fekumi ‘a e tangatá ki ha me’a ke faito’o’aki mo fakafiemālie ai ‘ene mo’uí. Ko e taimi lahi ‘oku fai e fekumí ia ki he ngaahi fakanonga hala, pea ko e ngaahi me’a te ne fakanonga he taimi nounou ka ne toe fakatupu ‘e ia ‘a e lotomo’ua mo e mamahi ‘oku lahiange.

‘Oku hangeē ‘eni ko kinautolu ‘oku fekumi ki ha fiemālie ‘i he ‘alokaholo mo e faito’o konatapú. Ko e feinga ‘eni foki ke matu’aki ta’ofi mei he ‘atamai ha fakakaukau manavasi’i, pea ke to’o mei he loto e mamahí mo e ongo ‘oku fonu he ngaahi fihifihi kehekehe.

Ko hono mele foki ‘a e ‘alokaholo mo e faito’o konatapú he ‘oku ‘ikai ke to’o ai ‘a e palopalemá, kā ‘oku ne toe fakaloloto ‘e ia ‘a e palopalemá.

‘Oku ‘i ai ha ni’ihi ‘oku nau fekumi fakafiemālie ki he me’akai, ki he ngaahi to’onga kehekehe ke fakafiemālie’i ai honau lotó, ‘o a’u ki he faihia mo e fai e to’onga kehe mei he anga mahení.

‘Oku fa’a hū heni ‘a e ‘ite’itá, ‘a e siolalo mo fakamele’i ‘a e me’a kotoa pē. Pea ko kinautolu koee ‘oku uesia lahí, ‘oku hangē koee ‘oku ‘ikai lava kenau toe fai ha me’a. ‘Oku nau tangutu pe ‘o siosio pe ki he ‘atá; pea ‘i ai foki mo kinautolu ‘oku toe lahiange ‘a e lue noa’ia he halá.

Ko e puke faka’atamai ‘oku ala hoko ia ki ha taha pē. Kā, ko kinautolu ‘oku nau lavea faka’atamai koe’uhí ko ha mamahi pe ko ha uesia tamaki ‘o ‘enau mo’ui ‘i ha fakatu’utāmaki, ‘oku mahu’inga fau ia ke fai ha tokanga kiate kinautolu.

‘Oku tokolahi ‘a kinautolu ‘I Tonga ni ‘oku nau fai e ‘ulungaanga ‘oku kehe atu mei he ‘ulungaanga anga maheni ‘oku ala fakahoko ‘e ha taha. Ko e faka’ilonga pe ‘eni ia ‘o e fokoutua faka’atamai, ko e fai e to’onga kehe atu mei he me’a ‘oku taau mo totonú.

‘Oku lavanoa ke faito’o e kafo faka’atamai mo e kafo ‘o e lotó. Pea ‘oku mahu’inga ke fai ha talanoa taau mo mahino mo e ni’ihi ko ‘ení ke lava kenau ake fo’ou mei he maumau mo e uesia tamaki ne nau foua ai.

‘Oku ‘i ai ‘a e tupulekina ‘o e fokoutua faka’atamai mo e fokoutua ‘oku ha’u ko e mamahi ‘a e lotó.

Ko kitautolu e fa’ahinga ‘o e tangatá ko e sino, ‘atamai, mo e laumalie. Pea ‘oku fai e ngāue mai ‘a e Laumālie Ma’oni’oni ke fakamo’ui mo faito’o ke mo’ui lelei hotau sino, hotau ‘atamai, mo hotau laumalie.

Ko e lahiange ‘o e ngāue’aki ‘o e faito’o konatapú mo e ‘alokaholo ‘a ia ‘oku ala hoko ai e kē mo e tamate, fakatu’utāmaki he Hala Pule’angá, mo e hā fua. Ko e nunu’a pe ia ‘o e fokoutua faka’atamai, ‘a ia kapau he ‘ikai faito’o, ‘e uesia lahi ai e mo’ui fakafo’ituitui, mo’ui ‘a e famili, mo’ui ‘a e koló, mo e Sosaieti Tongá.

(7)

Facebook Comments