Siaosi Pohiva

Siaosi Pohiva

KUO tukumai ha lipooti mei he Potungāue Ako (Ministry of Education and Training – MET) ‘a ia na’e teuteu ma’ae Minisitā Akó, Samuela ‘Akilisi Pohiva, ke tali ‘a e ngaahi fehu’i kuo ‘oatu mei he mitia, kae tautefito ki he Kosilio ‘a e kau Faiongoongo (Tonga Media Council), fekau’aki mo e ngaahi ‘isiu ‘o e Akó, mo hono liliu kuo fai ‘e he Minisita Ako mei he founga lipooti ‘o e ola ‘o e sivi – Maaka Tulifua (Standardisation), ki he founga lipooti Maaka To’ofua (Raw Marks).
Ko e lipooti ko ‘eni ne fa’u ia ‘e he ‘Iuniti Sivi – Examination & Assessment Unit (EAU) ‘o e Potungāue Ako.
Ko e tu’unga ‘o e sivi na’e fai ‘i he 2015 ‘oku fai ki ai ‘a e talanoa, pea na’e makatu’unga ‘i he founga Maaka To’ofua (Raw Marks) na’e tōlalo ‘aupito ai ‘a e ola ‘o e sivi ‘a e Form 5, Form 6, pea pehē foki ki he Form 7, tupu pe mei hono fakavave’i ‘a e liliu ta’efai ha mateuteu ki ai; ke hikifua mei he lipooti e ola – Maaka Tulifua, ki he Maaka To’ofua.
Kā, ko e ola ‘o e sivi ‘a e Form 7 na’a ne uesia lahi ‘a e teu hū ‘a e fānau akó ki he ‘Univesití. Pea na’e loto mamahi lahi heni ‘a e fānau akó, mātu’a mo e kau tauhi fānau.
Na’e hoko ai ha vālau lahi ‘i he fonua ni, he taimi pe koi a na’e tukumai ai ‘a e ola, pea toe hoko ai ‘a e fakamole lahi fe’unga mo e $10,579.25 ki hono toe huke ‘a e sivi ‘a e fānau mo hono toe fakamaaka fo’ou ‘o e sivi Form 5, 6, mo e 7.
Na’e toko 321 ‘a e kau kole ke fai ha toe vakai ki he sivi, pea ‘oku hulu ange ‘eni ‘i he toko 118 na’a nau kole ki he EAU ke toe vakai ki he’enau sivi ‘i he 2014.

Palopalema ki he Form 7 he kole hū ki he ‘Univesiti ‘i mulí
Fakatatau ki he lau ‘a e Lipooti ni, hili ‘a e ma’u ‘o e Maaka To’ofua ko ia ‘o e fānau ako Form 7, na’e ‘i ai ha ni’ihi na’a nau tohi kole hū ki he ngaahi ‘Univesiti ‘i muli ‘o ngāue’aki ‘a ‘enau lipooti ola Maaka To’ofua (Raw Marks).
Kā, ko e fanau ako Form 7 na’a nau kole hū ki he ngaahi ‘Univesiti ‘i Nu’usila, na’e ‘i ai ‘a e palopalema hono tali kinautolú. Na’e ‘ikai ke tali ia ‘e he ngaahi ‘Univesiti ‘o Nu’usila ‘a e lipooti Maaka To’ofua ‘a e fānau ako ko ‘ení.
‘I ha fetu’utaki’aki mo e taha ‘o e kau fale’i ma’olunga ‘o e ‘Ofisi –Student Administration ‘o e ‘Univesiti Massey, na’e mahino mai ai ‘oku ‘ikai kenau tali ‘e kinautolu ‘a e fānau ako Form 7 ‘oku ‘oange ‘enau lipooti sivi he Maaka To’ofua.
Ko e fiema’u mei he ngaahi ‘Univesiti ‘i Nu’usila ke ‘oange ‘enau lipooti sivi ‘o fakatatau ki he Maka Tulifua (Standardization), ‘a ia ko e tu’unga lipooti maaka ia ‘oku tali ‘e he ‘u ‘Univesiti ‘a Nu’usilá.
‘E toki tali p eke nau hū ki he ‘Univesiti ka ‘oange lipooti ola ‘o e sivi he Maaka Tulifua.
‘Oku pehē ‘e he Lipooti ne mahino pe ia mei he kamata ‘o e liliu ko ‘eni ‘e ‘i ai ‘a e palopalema, pea ko e ‘uhinga ia na’e kole ki he mitia ke tukuange ha taimi fe’unga kenau ngāue ai ke tali ‘i he ngaahi ‘Univesiti ‘i muli ‘a e founga lipooti ola Maaka To’ofua.
‘Oku pehē ‘e he Potungāue kuopau ke fai ha alea fo’ou ia mo e ‘Univesiti takitaha ‘i muli kenau tali ‘a e founga lipooti ola fo’ou ‘oku ‘alu ki ai ‘a Tongá.
Pea ko e founga koee kuo fokotu’u mai ‘e he Minisitā ke solova ‘a e palopalema ni, ke ‘oatu lōua pe ha lipooti ‘o e ola e sivi ki he fānau ako Form 7, ko e Maaka To’ofua (Raw Marks) ‘e taha, pea ko e Maaka Tulifua ‘e taha, ke ‘ave ia ki he ngaahi ‘univesiti ‘oku kole hū ki ai ‘a e fānau akó.
Ko e fehu’í foki pe ko e ha leva ‘oku fiema’u ai ke ua e founga lipooti ‘o e olá, kae ‘ikai ke ‘ai pe me’a koee ‘oku tali ‘e he ngaahi ‘univesiti ‘i mulí.
Ko e ha leva e fakalakalaka e ako he lipooti Maaka To’ofua, kapau ‘oku ‘ikai tali ia ‘e he ako’anga ‘univesiti ‘i muli?

Hoha’a ‘a e kau foaki sikolasipí
Kuo ‘omai foki mei he Hai Komisiona Nu’usila mo ‘Aositelelia ‘i ha’ana tohi ‘i he ‘aho 14 ‘o Ma’asi ki he Potungāue Akó ‘a e hoha’a ki he ua ko ia ‘a e lipooti ola e sivi ‘a e fanau ako Form 7.
‘Oku nau fehu’ia ‘a e ‘omai ha ola kehekehe ‘e ua ‘o e sivi ‘a e fanau ako Form 7. ‘Oku nau pehē ‘oku ‘i ai ‘a e fifili lahi ‘a e matu’a mo e ngaahi komiti sikolasipi fekau’aki mo e me’a ni, pea kuo ‘osi lahi e launga mai ia ki he ongo Hai Komisiona ki he tohi kole ko ia ki he ngaahi sikolasipi ‘o e 2016.
Pea ‘oku ‘i ai foki ‘a e hoha’a mei he matu’a ki he totonu ‘o e founga fili sikolasipi ‘o e 2016, ‘o makatu’unga he lipooti Maaka To’ofua e ola, ‘a ia ne fakahoko ki he fanau ako Form 6.

Ko e liliu fakavave mei he Tulifua ki he To’ofua
Na’e ‘i ai foki ‘a e fokotu’u ke ‘oua ‘e lipooti Maaka To’ofua ‘ata’ata pe, pe ko hono lipooti Maaka Tulifua, ka ke fakataha’i ‘a e ongo foungá ke lava ke ma’u mei ai ‘a e ola totonu ‘o e sivi ‘a ha ki’i tamasi’i mo ha ki’i ta’ahine.
Ko e fehu’i foki na’e ‘oatu mei he mitia, pe ko e hā e ‘uhinga na’e fakahoko ai e liliu fakafokifā mo faka’aufuli ki hono lipooti e ola ‘o e sivi, ta’e’iai ha teuteu lahi ki ai?
‘Oku pehē ‘e he Lipooti ko e ngāue na’e fai ‘e he EAU ko e fakahoko pe me’a ne fai tu’utu’uni ki ai ‘a e Minisitā, ‘a ia na’e fakahoko ‘i he fakataha mo e kau puleako ‘i he ‘aho 19 ‘o Ma’asi.
Na’e fiema’u pea faitu’utu’uni ‘a e Minisitā ki he EAU ke fakahoko ‘a e kotoa ‘o ‘enau ngāue ‘o fakatatau ki hono fokotu’u ko ia ‘o e founga lipooti ola e sivi Maka To’ofua.
Ko e ngaahi ngāue ‘eni ne pau ke fai:
1. Fakahā ki he va’a ‘o e SPC fekau’aki mo e Akó, ‘a ia ko e EQAP (Educational Quality and Assessment Programme) ‘i Suva fekau’aki mo e liliu ko ‘eni ‘oku fai ki he fakamaaka sivi ‘i Tonga ni. Ko e EQAP foki na’e ‘uluaki ‘iloa ko e SPBEA – South Pacific Board of Educational Assessment. Ko kinautolu ‘oku nau ngāue fakafeitu’u ke seti mei aim o monitoa ‘a e sivi ‘a e ngaahi ako.
2. Fai ‘a e fakataha ‘i Mē 11 mo e Talekita ‘o e EQAP ‘a e kau ‘ofisa ‘o e Akó – MET, pehē ki he kau ‘ofisa ako ngaahi ako Siasi, mo e kotoa ‘o e kau Puleako. Ko e ‘uhinga e fakataha ke fai ha fanongo ki he ngaahi fevahevahe’aki, pea ke feinga ‘a e EQAP ke ‘omai ha fale’i fakatekinikale ki he liliu ko ia ki he founga lipooti Maaka To’ofua.
3. Fai e fakataha ‘i Sune 9 ke sio ki he lipooti mei he EQAP. Ko e Minisita na’e sea he fakataha ko ‘eni. Na’e kole ai ‘a e kau ‘Ofisa MET mo e kau Taki ‘o e Potungaue Ako ‘a e Siasi Uesiliana, ke toloi e fakahoko ‘o e founga lipooti Maaka To’ofua ‘i he 2015 kae’oua kuo kakato e teuteu mo e ngaue ki hono tali e Maaka To’ofua ‘i he TNFSC (Tonga National Form Seven Certificate). Pea kuo ‘osi kamata mai foki ‘a e 2015 ia mo hono fai ‘a e Internal Assessment ‘o fakatatau ki he founga lipooti angamaheni, ‘a ia ko e Maaka Tulifua.
Kā, na’e ‘ikai ke tali ‘eni ‘e he Minisitā. Na’a ne hoha’a ki he tōnounou ‘o e founga lipooti Maaka Tulifua, pea ko ia ai na’a ne fiema’u ke hoko atu e lele ‘a e Potungāue he founga lipooti Maaka To’ofua.
4. Ha’u e timi mei he EQAP ‘a ia na’e taki mai ai ‘a e foha ‘o e Minisitā, Siaosi Pohiva (Taki ia ‘o e Va’a Sivi ‘a e EQAP) ‘i Sune ‘i he kole ‘a e Minisitā, pea fakahoko ai ‘a e ako ki he kau fa’u silapa, mo e kau fa’u sivi.
5. Na’e toe ha’u foki ha timi mei he EQAP ‘i ‘Aokosi, ‘o kau ai ‘a Siaosi Pohiva, ke fakahoko e ako ‘a e kau faiako Form 7 fekau’aki mo e fakamahino’i ‘o e liliu ko ia ‘o e lipooti e ola e fakamaaka sivi ‘a e fānau ako ki he Maaka To’ofua.
6. Na’e toe foki mai ‘a e timi ko ‘eni ‘i ‘Okatopa ke fai e vakai ki he pepa sivi ‘o e 2015 kimu’a pea fakahoko ‘a e sivi ‘o e 2015.
Na’e fai foki e ngaue ke fakahoa ‘a e pepa sivi TNFSC mo e founga lipooti fo’ou, kā ko e uike pe ‘e taha ne tukuange ke fakahoko ai ‘a e ngāue ni. Pea mahino mei hano ‘analaiso ‘e he tangata IT, Piveni Piukala, pea toe vakai ki ai ‘a e kau ‘ofisa EAU ‘o mahino ‘oku ‘i ai ‘a e ngaahi tōnounou ia he feinga ke fakahoa e pepa sivi ‘a e TNFSC mo e founga ‘e liliu ki ai.
Na’e toe mahino foki mei he feinga ke fai e fakahoa, ko e founga anga maheni ‘oku matu’aki faingata’a ia ke fai ha mavahe mei ai ‘a e kau fa’u sivi tukukehe kapau ‘e fai hano liliu. Pea ‘oku ‘i ai ‘a e ngaahi lesoni ia ‘e matu’aki faingata’a mo’oni hano fakahoa ke maaka 100 ‘o hangē ko e ngaahi lesoni kehe ‘i he TNFSC. Ko e ngaahi lesoni ‘eni hangē ko e ‘Akaunitingi, Hisitolia, ‘Ingilisi.
7. ‘I Novema na’e toe ‘a’ahi mai ai ha timi mei he EQAP, kau ai ‘a Siaosi Pohiva, ‘a ia ko e ‘a’ahi ‘eni hono nima, ke fai e fakataha mo e kau fakamaaka sivi.
8. Pea ‘i Tisema na’e toe ‘a’ahi mai ai ‘a e timi EQAP, kau ai ‘a Siaosi Pohiva, ko e ‘a’ahi ia hono 6, ke fai ha fakataha mo e CDU – Curriculum Development Unit (‘Iuniti ki he Fa’u Silapa), ke fai ha liliu ki he silapa.

Ngaahi Ngāue ki he ola ‘o e siví
Na’e fai e ngāue ki he ngaahi ola ‘o e sivi – TSC, TFSC, mo e TNFSC ki he 2015. Na’e fengāue’aki ‘a e EAU mo e kau ngāue IT ‘a e EQAP ki he ola ‘o e sivi mei Tisema ki he ‘uluaki uike ‘o Sanuali. Na’e fakahā ai ‘e he CEO Le’ole’o ‘o e Akó, Dr. Raelyn ‘Esau, kuo ma’u ha tu’utu’uni mei he Minisitā ke ‘omai ‘a e tangata fale’i IT ko Piveni Piukala ke fai ha ngāue ki he ola ‘o e siví.
‘Oku pehē ‘e he lipooti na’e kole ‘a Siaosi Pohiva ke ‘oange ‘a e faile ‘o e ngaahi fakamatala ‘o e TNFSC, pea ‘i Sanuali 6, na’e ‘oatu ai ‘e he EAU, ‘i he tu’utu’uni ‘a e CEO Le’ole’o.
Na’e ‘oatu leva ‘a e faile ko ‘eni kia Piveni ‘i he ‘aho 14 Sanuali ke fai ha ngaue ki ai. Ko e fakakau mai ko ‘eni ‘o Piveni, na’e tupu ia mei ha hoha’a ‘a e CEO Le’ole’o ko e timi IT ‘a e EQAP, he na’e ‘ikai lava kenau fai e ngāue na’e ‘amanaki ki ai ‘a e EAU fekau’aki mo e ola ‘o e sivi TNFSC.
Kaekehe, ‘i he ‘aho 11 Sanuali 2016 na’e tukuatu ai e ola fakaangaanga ‘o e sivi TNFSC 2015. Na’e tukuatu ‘eni ki he Minisita mo e CEO Le’ole’o kae’uma’ā ‘a e kau Talekita Ako ‘a e Siasi.
Kā, na’e mahino ‘a e ngaahi tōnounou he ola ko ‘eni, pea fai e ngāue ke fakalelei’i. ‘Oku mahino ia ko e natula ‘o e fakavave’i ‘o e ngāue ke liliu ki he Maaka To’ofua fakatupu ai ‘a e ngaahi tonounou mo e fehalaaki ko ‘ení.
Hili e tukuatu ‘o e lipooti ola ‘o e sivi Maaka To’ofua ‘o e TNFSC, na’e fai e ngāue ke Maaka Tulifua ‘a e ola ‘o e sivi ‘a e Form 7 ‘e he kau ngāue ‘a e EAU ta’ekau mai ki ai ‘a e EQAP.
Ko hono lipooti e Maaka Tulifua ko ‘eni ‘o e ola e sivi TNFSC, na’e fai ia koe’uhí ko e tu’utu’uni ‘a e Minisitā, ke hoa mo e fale’i ‘a e EQAP ke fai ha ngāue ke ma’u ha ola ‘e 2, ‘a ia ko e ola ‘e taha tupu mei he Maaka To’ofua, pea ko e ola ‘e taha mei he Maaka Tulifua. Ko e ola Maaka Tulifua na’e ‘oatu pe ia ki he fanau ako Form 7, pea ko e taumu’a ki heni ke ‘oua ‘e ‘i ai ha palopalema ‘i ha’anau kole hū ki he ‘univesiti ‘i muli.

Aofangatuku
‘Oku hanga ‘e he Lipooti ko ‘eni ‘o ‘omai ‘a e fakamahino ki he ngaahi me’a ne hoko fekau’aki mo e liliu ko ia kuo fai ki he founga lipooti ‘o e ola e sivi ‘i Tonga ní, kā ‘oku te’eki ai pe ke lava hano fakahā mahino mai ko e hā ha lelei fekau’aki mo e liliu ko ‘ení.
‘Oku toe mahino foki ‘a e ‘ikai ha mateuteu ki he liliu ko ia kuo fai, pea hoko ai ‘a e tōlalo e ola, pehē foki mo ha tōnounou lahi he ngaahi ngāue mei he Potungāue.
Ko e liliu kuo fai, ne lele ofi pe ia he ‘ai’ainoa’ia, ‘o ‘ikai ke fakahoko lelei ke ma’u e leleitaha ‘o e me’a ‘e lelei ki he fānau ako, pea pehē ki he tu’unga ‘o e akó ki he kaha’ú.
‘Oku kei fai pe foki mo e fehu’ia ‘o e tukumai ‘e he Va’a Ngaue ki he sivi mei he EQAP ‘a e foha ‘o e Minisitā ke taki mai mo kau he timi ne ‘a’ahi tu’o 6 mai ki Tonga ke ngāue ki he liliu ki he Maaka To’ofua.
Ne ‘oatu ha tohi ‘a e taha ‘o e kau faiongoongo ki he SPC, pe ‘oku ‘ikai kenau ‘ilo ‘a e fepakipaki ‘o e ngaahi fiema’u – conflict of interest – ‘i he me’a ni, ‘i he ‘omai e tokotaha ko e foha pe ‘o e Minisita ke ngāue mo e Minisita ki hono fakahoko e liliu ko ia ki he Akó.
Kuo mahino foki ‘a e mo’oni ‘a e ngaahi tukuaki mo e ngaahi fakaanga ne fai mai pe mei he kamata ‘o e 2015, fekau’aki mo e ‘omai ‘o Piveni Piukala (tangata fale’i IT), ko e kaungame’a mo e kaunga ngāūe ‘o e foha ‘o e Minisitā, Siaosi Pohiva, pea ko ‘eni ‘oku hoko e ngaahi me’a ko ia, neongo ‘a hono faka’ikai’i ‘e he Minisitā ‘i he 2015, pea fai e lau ‘e faka’ilo ‘a e kau tukuaki’i.
Kuo mahino ko e polokalama software ‘eni ‘a Piveni ‘oku ngāue’aki, pea ‘oku te’eki ai ke mahino pe ko e ha hono mahu’inga, kā na’e fai foki e fakaanga’i ‘e “a’u ki he lau miliona”.
Kaekehe, ‘oku mālie ‘a e me’a ‘oku hu’u ki ai ‘a e Ako, pehē ki he ngāue ‘a e Minisitā Ako, mo hono foha, Siaosi Pohiva, kae’uma’ā ‘a e tangata fale’i IT, Piveni Piukala, ko e kaungame’a pe mo e kaungā ngāue ‘o e foha.

(40)

Facebook Comments