Viliami Pousima Afeaki

Viliami Pousima Afeaki

 

KUO pekia ‘a e taha ‘o e kau mo’unga’itangata ‘o Tonga ‘i he mala’e politikale, kae’uma’ā e ngaahi mala’e kehekehe pē, Viliami Pousima Afeaki, ta’u 66, ‘o Pangai, Ha’apai, kā na’e fa’a tala pe ‘e Viliami ko ‘ene ha’u mei Fanganonu, Hihifo, Foa, Felemea, Lapaha.

Na’e hiki ‘a Viliami ‘i he falemahaki McKay-Dee Hospital, ‘i Ogden, Utah ‘i ‘Amelika ‘i he ‘aho 24 ‘o Ma’asi.

Ko Viliami na’e fakafofonga Fale Alea mei he 1987 ki he 1993, pea ‘oku kei manatu pe ‘a e tokolahi ki hono le’o malie mo lelei ‘i he ngaahi tipeiti ‘i he Fale, pea ne hoko ko e taha ia ‘o e kau fakafofonga le’o afea ki he Hou’eikí.

Ko e pekia ‘a Viliami tupu mei ha ngaahi faingata’a’ia ‘i hono mafu mo e kofu ua. Na’e ‘osi fai pe hono ngaahi faito’o mafu kimu’a atu, kae hoko ‘a hono faito’o fakamuimui ko ‘eni ke hiki ai fakafokifa.

Ko e ‘api nofo’anga foki ‘o Viliami ‘oku ‘i Havelu, ka na’a ne fefolau’aki pe he vaha’a ‘o Tonga mo ‘Amelika.

Ko e ongo matu’a ‘a Viliami ko Soakimi Pousima Afeaki pea mo Lisia Fatongiahe’a Vea, kuo na pekia. Ko Pousima ko e tangata loea ‘iloa ia ‘i Tonga, pea ko e fakafofonga Fale Alea he ta’u lahi mei Ha’apai.

Ko e fika 7 ‘a Viliami ‘o e fānau ‘e toko 11. ‘Oku kei mo’ui pe ‘a Vikatolina Folaumoetu’i, ‘Oto’ota Likiliki, ‘Emeliana Chandra, Malia Ma’ukavakimu’a Palavi, Soakai Afeaki, Malia’ilutu Inukiha’angana, ‘Alisi Taumoepeau, mo Soane Afeaki. Ko Andrew mo Tasisio Afeaki kuo na pekia.

Ko e uaifi mo e ‘ofa’anga ‘o Viliami, Henilieta Suliana Wolfgram Afeaki, ‘oku kei laumalie lelei pe, mo ‘ena fānau ‘e toko nima (5), ko Telesia Tonga (Walter), William Pousima (Seilaine Itaehau), Nicholas Maeaeafe (Joyce Tonga), Finau ‘Alai Kahoha’apai, mo Kitekei’aho Fataimotulalo (Uina Mokofisi).

Ko e makapuna ‘e toko 25 ‘o Viliami mo Henilieta mei he’ena fanau.

Na’e ‘i ai foki ‘a e fanau ‘a Viliami ki mu’a, ko Victorina L. Kioa (Ngongo), Stanley Havea (Rita Karlich), mo ‘Emeliana Afeaki.

Ko e makapuna ‘e toko 12 mei he fānau ko ‘eni, pea ko e makapuna ua ‘e toko 3.

Ko e foha kimu’a ‘o Henilieta, Daniel Q. Humphrey (Jennifer Rogers) ko e fanau ‘e toko 6 mo e mokopuna ‘e 1.

Ko e fakakātoa, ko Viliami na’e matu’aki fiefia mo mo’ui’aki ‘ene makapuna ‘e toko 43, mo e makapuna ua ‘e toko 4.

Fakatatau ki he fakamatala mei he ‘ofefine lahi ‘o Viliami mo Henilieta, Telesia Tonga, ko e me’a ‘oku tu’ukimu’a kiate ia fekau’aki mo ‘ene tamai, ko e tangata anga‘ofa.

“Na’e mālohi ‘ene tui ki he ‘Otua pea ne fai fatongia ki ai ‘aki e kotoa hono loto, ‘atamai, mo hono ivi,” ko e lau ia ‘a Telesia.

“Na’a ne ‘ofa lahi mo’oni ‘i he’eku fa’é ‘o ‘ikai hano tatau, pea ko e me’a’ofa leleitaha ‘eni ‘oku ala ma’u ‘e ha fanau, ke ‘ofa ‘a ‘ete tamai ‘i he ‘ete fa’é.”

“ Na’a ne mo’ui’aki ‘a e Tu’i, Fonua, mo hono ngaahi tokoua mo tuofafine. Na’a ne fakalangilangi’i e hingoa ‘ene tangata’eiki, he ko e ‘ofa’anga ia ‘ene fa’e. ‘I he me’a kotoa pe na’a ne fai mo lea’aki, na’a ne fai ki he leleitaha, pea fonu ‘ofa.”

“Ko e tangata ‘ofa mo’oni he lea mo e ngaue. Ko e tokotaha ko ‘eni ko e uho ia ‘o ‘emau mo’ui, pea temau feinga ke mo’ui mo ‘ofa hangē ko ia, pea ke mau lava ‘o sio ki ai ‘i ‘Itaniti.”

Ko Viliami na’a ne ako ‘i ‘Apifo’ou, pea hoko mai ai ki he Tonga High School, ‘o ‘alu mei ai ki he Auckland Grammar School ‘i Nu’usila.

Na’e hoko atu foki ‘a e ako ‘a Viliami ‘i ‘Amelika mo ngaue ‘i he mala’e ‘o e takimamata, pule hotele, pea ko e loea foki ‘i Tonga ni, mo e fakafofonga Fale Alea he ta’u lahi.

‘Oku ‘oatu heni ‘a e popoaki ‘ofa meiate au mo e kaunga ako ne mau folau fakataha ki Nu’usila ‘i he 1966. ‘Ofa lahi atu kia Henilieta Suliana, Telesia mo e fanau, kae’uma’ā e ngaahi makapuna.

Totoka ā ‘i he nonga ‘a e ‘Eiki.

(49)

Facebook Comments