TAVAKE FANGUPO

‘OKU fakautuutu ke manakoa mo mahino ange ki he kau manako ‘akapulú, tautautefito ‘i Tongá ni ‘a e ‘akapulu liikí. Na’e fuoloa ta’u pē ‘a e ‘i Tongá ni ‘a e sipoti ko ení, ka na’e ‘ikai ke fu’u a’u fēfē ‘a hono poupou’í ‘o hangē ko hono poupoua ‘o  e ‘akapulu ‘iunioní pea mo ‘etau timi ‘Ikale Tahí foki.

   Na’e fuofua ‘omai mo kamata e liikí ‘i Tongá ni ‘i he ta’u 1986, pea kamata ai pē e tafoki hake e ngaahi kalapu ‘e ni’ihi ‘o fokotu’u ‘a ‘enaungaahi timi liiki.

   ‘I he ta’u 1988, ne ‘osi fe’unga mo taau ai ‘a Tongá ni ke fokotu’u ha timi fakafonua ke nau kau ‘i he ngaahi fe’auhi fakavahapule’angá. Ko e ta’u tatau foki eni na’e fakahoko ai e fe’auhi liiki Pacific Cup, pea na’e fakahoko ia ki ‘Apia Ha’amoa.

    Na’e veipā ai ‘a Tonga ‘i he’enau fuofua tau fakavaha’apule’angá mo Ha’anoa ‘Amelika pea ne ikuna faingofua ai ‘a Tonga ko e 38-14.

   Na’e a’u mai ki he ta’u kuo ‘osí. pea ko e tu’unga ma’olunga taha ia kuo a’u ki ai ‘a e timi fakafonua ‘a Tongá, ‘a ia ko e Mate Ma’a Tongá´’o a’u ki he semifainoló ‘i he fe’auhi Ipu ‘a Mamaní, pea ‘ikai ngata aí foki ka kuo tau a’u ‘o fika 4 ‘i mamani kotoa ‘i he fakahokohoko ‘o e ngaahi timi liiki lelei tahá.

   Ko e talu mei ai mo e toe manakoa mo poupoua ‘aupito e ‘akapulu liikí ‘i Tongá ni, pea na’e hanga ai ‘e he timi Mate Ma’a Tonga ‘o fakatahataha’i e Tonga kotoa ‘i mamani.

   Kaikehe, ‘oku lolotonga fakahoko ‘a e fe’auhi makehe ia ‘a e liikí ‘i Tongá ni pea ‘oku ‘iloa ia ko e fe’auhi ‘Ipu ‘a Jason Taumalolo’. Ko e lava ‘aki eni e uike ‘e 4 e lele mai e fe’auhi ko ení, pea ‘oku ‘i ai e fokotu’utu’u e Komiti Liiki ‘a Tongá ke fakahoko e fainoló ‘i he ‘aho Tokonaki 12 ‘o Meé.

    ‘I he ta’u kuo ‘osí ‘i he taimi ne ‘i Tongá ni ai e timi Mate Ma’a Tongá, ne kamata ai hono fa’ufa’u ke fakahingoa e fe’auhi ‘o e ta’ú ni ke ui ko e fe’auhi Ipu ‘a Jason Taumaloló.

   Ko e ‘aho ko ení, ‘e ‘i ai tonu ai ‘a Jason Taumalolo ke foaki ‘ene fu’u Ipú ki he timi te ne ikuna e fainoló. ‘Oku ‘ikai ngata pē ‘i he Ipú ka ‘oku ‘i ai mo e ngaahi pale pa’anga ‘a ia ko e tokoni ia ‘a e Kautaha Fetu’utaki ‘a Tongá (TCC).

   ‘Oku ‘i ai foki e me’a mahu’inga ‘oku tokanga ki ai e kau va’ingá pea pehē foki ki he kau poupoú, na’a iku uesia e fe’auhi ko ení.

   Ko e me’a ‘oku fai ki ai ‘a e tokangá, he ‘oku ngali  kamata ‘a e fe’auhi ‘akapulu ‘iunioní ia ‘i he ‘aho 7 ‘o ‘Epelelí, pea ‘e fepaki eni ia mo e fe’auhi Ipu ‘a Jason Taumaloló.

   ‘Oku kehekehe foki ‘a Tongá ni ia mo muli, he ko e kau va’ingá, ko kinautolu pē ‘oku nau ‘akapulu ‘iunioní, pea ko kinautolu pē ‘oku toe va’inga liikí, pea ka faifai pea fakahoko ai pē ‘a e fe’auhi ‘iunioní ‘i ‘Epeleli, ‘e ‘ikai ‘ilo pe ‘e fēfē.

   Ko e anga mahení foki ‘oku lele ma’u pē ‘a e ‘ū taú ‘i he ‘aho Tokonaki kotoa. Kapau leva ‘e pehē, pea ko e me’a pē ‘e iku hokó ko e mavaeua ‘a e kau va’ingá ‘o ‘ikai ‘ilo pe ko fē e fe’auhi te nau kau ki aí.

    Na’e a’u tonu ai e Taimi ‘o Tongá ki he  Pule Lahi ‘o e Komiti Liiki Fakalakalaka ‘a Tongá, Tavake Fangupō ‘o fakahoko ha talanoa makehe mo ia, fekau’aki mo e ‘īsiu ko ení.

   Fakatatau ki he fakamatala ‘a Tavaké, ko e ta’u ‘aki eni hono 4 e lele mai ‘enau fe’auhi liiki fakakalapú ‘i Tongá ni.

   “‘Oku kamata ma’u pē ‘a e fe’auhi liikí ‘i he konga kimu’a ‘o e ta’ú pea toki hoko atu e fe’auhi ‘akapulu ‘iunioní. Ko e ta’ú ni ‘e fepaki e fe’auhi ‘akapulu liikí mo e ‘iunioní, pea ‘oku mau ‘osi teuteu pē ki ai”, ko Tavake ia.

   Na’e hoko atu ‘ene fakamatalá ‘o pehē, ‘oku kau lelei ma’u pē e ‘uluaki fakahoko e fe’auhi liikí, ‘o hangē ia ke kamata ai e fakamalohisino ‘a e tamaiki ‘akapulú, pea ke nau faofao ai pē ai ki he fe’auhi ‘iunioní.

   “‘Oku mau poupou ‘aupito ki he ‘iunioní pea ‘oku mau feinga ma’u pē ke mau ngāūe fakataha mo kinautolu ki he lelei fakalukufua ‘o ‘etau kau ‘akapulú”.

    ‘Oku ‘i ai mo e sio ki he tafa’aki ‘e taha, he kuo ‘osi maau foki hono fili ia ‘o e timi Tonga A pea pehē ki he timi fakafonua toko 7, pea ‘oku hangē leva ia ‘e ‘ikai fu’u māfana fēfē e tamaiki ‘akapulú ia ke nau ‘iunioni.

    ‘Oku ngali manakoa ange e liikí ia, pea ‘asi pē ia ‘i he lahi e ngaahi timi ‘oku nau kau ki aí. Ko e ta’u kuo ‘osí ne kau pē e ngaahi timi ‘e 14, ka ko e ta’ú ni, kuo a’u ki he timi ‘e 30, pea vahevahe ia ki he Kalasi 1 mo e Kalasi 2.

    ‘I he fakamatala ai pē ‘a Tavaké, na’á ne fakahā ai ‘enau ngaahi fokotu’utu’u ki he ta’ú ni, pea ‘oku kau ki ai e ngaahi fe’auhi kehekehe ‘e 16 ‘i Tu’apule’anga ‘e folau ki ai ‘a ‘etau fānau va’ingá mei Tongá ni.

“‘E filifili kātoa pē meí he’etau tamaiki pē ‘i Tongá ni ke nau kau ki he ‘u tua ko ení. ‘E malava ai pē ke ma’u ha’anau ngaahi faingamālie ‘i muli, pea ko e taha pē ia ‘o ’emau fokotu’utu’u ngāué ke fakalakalaka’i e talēniti ‘akapulu ‘o ‘etau fānaú pea ke ma’u foki hanau kaha’u lelei ‘i he ‘akapulu liikí”, ko e fakamatala ia ‘a Tavaké.

   Na’e faka’osi ‘aki ‘e Tavake ‘ene pehē ‘oku nau poupou lahi ‘aupito kinautolu ki he’etau fānau ‘akapulú ‘o tatau pē e ‘iunioní mo e liikí, pea ‘oku nau feinga ma’u pē ke kumi ha faingamālie ma’ae kau va’ingá, ‘o hangē ko e tu’unga ‘oku a’u ki ai ‘a ‘etau fānau Mate Ma’a Tongá.

    

(46)

Facebook Comments