Kuo tali ‘e he Fakamaau’anga Tangi ‘i he Monite 26 ‘o Ma’asi ‘a e tangi ‘a e Siasi Tokaikolo ‘Ia Kalaisi felave’i mo e tu’utu’uni ‘a Fakamaau Lahi Scott ‘i he ta’u kuo ‘osi 2017  felave’i mo e kelekele, falelotu mo e fale nofo’anga faifekau ‘i Kolomotu’a ke foaki ki he Feohi’anga Mo’ui Fo’ou.

‘Oku fakahalaki ‘e he Fakamaau’anga Tangi ‘a e tu’utu’uni na’e fakahoko ‘e he Fakamaau’anga Lahi. Ko e Feohi’anga Mo’ui Fo’ou ko e ni’ihi ‘o e Siasi Tokaikolo na’a nau mavahe ‘o fokotu’u ‘a e siasi ni.

Na’e tu’utu’uni ‘a e Fakamaau’anga Tangi ko e ngaahi koloa ni ko e koloa totonu pe ‘a e Tokaikolo pea ‘oatu ‘a e tu’utu’uni ni mo e ‘aho ‘e 21 ke fakahoko ai ‘a e fetukutuku ‘a e Mo’ui Fo’ou pehe ki he’enau fua kotoa ‘a e fakamole ‘a e tafa’aki ‘a e Siasi Tokaikolo ‘Ia Kalaisi.

‘Oku kau mo e tu’utu’uni ke lesisita ‘a e ngaahi koloa kotoa ni ‘i he Siasi Tokaikolo ‘ia Kalaisi.

Ko e tu’utu’uni mei he Fakamaau’anga Tangi ko e aofangatuku pea mo e tumutumu ia ‘o e ngaahi Fakamaau’anga. Ko William Clive Edwards Snr na’e fakafofonga Lao ma’a e Siasi Tokaikolo.

Kuo ‘osi fakafoki ‘a e ‘Api Siasi ‘i Ha’ateiho pea ko Kolomotua’ ‘eni kuo to e fakaiku pe moia ki he Siasi Tokaikolo ‘Ia Kalaisi.

(20)

Facebook Comments