Na’e foaki atu ki he Kosilio Fakakolo ‘a Pea ‘i Tusite ‘o e uike kuo ‘osi ha tokoni mei Nu’usila ko e fakataumu’a ke fakalelei’i ‘a e ma’u’anga vai ‘a e kolo ‘a ia na’e maumau’i taha ‘o e ngaahi tangikee ‘e he saikolone Gita ‘a ia na’a to ‘i he mahina kuo ‘osi.

Ko e tokoni ko ‘eni ko e pa’anga ‘e 4 afe tupu pea ko e vaevaemanava ‘eni mei he kainga mo e maheni ‘o e ongomatua ‘i Pea na’a na nofo ‘i Uelingatoni ‘a ia ko Tu’ikolongahau pea mo Ruth Toumu’a.

Na’e fakafofonga ‘e he ‘OFisa kolo pehe ki he toenga ‘o e kosilio ‘a e fakamalo loto hounga’ia mo’oni koe’uhi ko e tu’u mai ‘a e kainga muli ko ‘eni ‘o tokoni mai ki he kolo hili ‘a e fakatamaki na’e hoko ‘o uesia ai ‘a e fiema’u vivili ‘oku tofuhia kotoa ai ‘a e kolo.

‘Oku laui ta’u ‘a e fakafou mai ‘a e ngaahi tokoni ‘I he famili Toumu’a ki he kolo kae tautautefito ‘eni ki he ako’anga lautohi Pule’anga.

‘Oku ‘I ai mo e tokoni ki he Lautohi Pule’anga ‘a ia na’e uesia ‘o haea pehe ki he ngaahi maumau kehe pe ‘a ia ‘oku ‘amanaki ke foaki atu ‘i he uike nip e.

Ko kinautolu ‘a e kau tokoni mai mei Nelson ‘i Nu’usila ko Mr. R & Mrs S. Stokes pehe kia Mr. C & Mrs P. Carson. Mei Wellington na’e kau mai ki ai ‘a e kaingalotu ‘o e Siasi Faka’ingilani ‘o St Annes pehe kia Mr. B & Mrs. Leonard, Mr J & Mrs J Lowe, Mrs R. Tomilson, Mrs S Bailey, Ms Z Park pea mo e Komiuniti ‘o Northland ‘i Uelingatoni.

(8)

Facebook Comments