PITA-TAUMOEPENU-(LEFT)

 

Na’e ‘i Tonga ni ‘a e ki’i talavou Tonga Pita Taumoepenu ‘oku va’inga ma’a e timi ‘akapulu NFL San Francisco 49ers.

Ko e malolo mai ‘eni ‘a Pita ki hono famili ‘i Pea ‘a ia na’e tupu hake pe ‘a e ki’i talavou ni talu mei he lau mahina he’ene kei pepee ‘o toki foki ki he ‘Amelika ko hono ta’u 17.

Na’e ma’u faingamalie ai ‘a Pita ‘o ako he Univesity of UTAH ‘one va’inga fakakolisi ‘i he timi ‘a e ‘Univesiti he Utes pea mei ai na’e unuhi mai ‘e he 49ers ki ha aleapau ta’u 4.

Ko Pita ‘oku ne kei ta’u 22 pea na’e tupu ‘i Tonga ni he ongomatua ko ‘Ofa mo Siuola Ika’ila ‘a ia ko ‘Ofa ko e tehina ia ‘o ‘ene fine’eiki Huafaikikava Mokofisi.

Na’e ‘i heni tonu ‘a Pita lolotonga ‘a e polokalama ‘a e Uike Katoanga Kainga ‘o Lavaka pea na’a ne fakahoko ‘a e lea fakalotolahi ki he fanau to’utupu ‘o ne nofo pe ki he mahu’inga ‘o e mo’ui manatu ki ‘api. Neongo ‘a e ngaahi faingamalie pea mo e monu ‘oku tofanga ai ka he’ikai ke ngalo ‘a ‘api, ‘a e kolo pehe ki he fonua na’e ohi hake ai ia ‘o hoko ko e fuofua ako’anga ma’ana ‘a e mo’ui kalusefai, mo’ui fakatokilalo pea mo e ‘ofa. “ Ko e me’a ‘oku mahu’inga kiate au ko e ‘ofa mo e manatu ma’u pe ki ‘api”. ‘Oku ta tu’o lahi ‘a e ‘asi ‘a e talavou ni he ngaahi mitia he ope ‘one talanoa ki he’ene tupu ‘a e masiva ka e ‘I ai e ‘ofa pea pehe ki he’ene laukau’aki ko e Tonga ia.

Ko e foki mai ‘a Pitasoni ‘oku kei manako pe ke ne ‘alu ki ‘uta utu ma’ala, kaka niu, tokoni ki he famili pea ke kei nofo pe he fale na’e tupu hake ai ‘o ‘ikai ke mahu’inga kiate ia ha ngaahi fakaafe ka ke puke faingamalie ke feohi mo hono famili ‘o kei laukau’aki e kai luu, inu ‘otai pea mo e kai keke ‘isite.

Na’e foki atu ‘a Pitasoni he Tokonaki ‘o e uike kuo ‘osi ke hoko atu ‘a ‘ene fakamalohisino mo e teuteu ki he fa’ahi ta’u va’inga hoko mo e 49ers.

Ko Pitasoni ko e mokopuna ia ‘o Meleseini Taumoepenu mo Tiponi Mokofisi ‘o Pea mo Vaotu’u.

(41)

Facebook Comments