Na’e toki talaki mai foki ‘i Ma’asi ‘e he Pule’angá, ‘a e palani ‘a Tonga ni ko e ‘National Climate Change Policy’ (Polisii Fakafonua ki he Feliliuaki ‘o e ‘Ea) ke tanumaki ‘aki ha Tonga ‘oku Matu’uaki (Resilient Tonga) mei ha ngaahi fakatamaki ‘e hoko, ke a’usia kimu’a ‘i he 2035.

‘Oku tau fakamalō ki he ngaue lahi kuo lavá pea ‘oku fai pehē pē ‘a e ngaahi fonua Memipa ‘e 190 tupu ‘o e UN Framework on Climate Change Convention (UNFCC). Koe palani ko’ení ‘oku ha’iha’i kitautolu katoa ‘i he tapa kotoa ‘o ‘etau nofó ‘ihe ta’u ‘e 20 ka hokoo, ka ‘oku ‘i ai ‘a e fifili lahi ‘i he hangē ha fu’u kupenga ‘a e me’a ni, pea ‘osi angé na’a kovi ange ‘a e faito’o (ngaahi fakakaukau ‘oku fokotu’utu’uu) ‘i he fokoutua ‘e hokó (ngaahi palopalema ‘e malava ke hokó).

Ko e heletā fakatoumata ‘oku ngaue’aki ki he ngaahi fokotu’utu’u ni ‘oku ui ko e ‘precautionary principles’ (ngaahi fakakaukau tokateu), ‘a ia ‘oku ngaue’aki fakaemamani lahi ki he mo’ui ‘a e kakaí mo e ‘atakaí pē, ke ‘oua ‘e hoko ha fakatamaki (harm). ‘Oku lahi ‘a hono leleí mo e koví, ka ko e ‘isiu pe ‘e ua ‘e fai ai ‘ae fokotu’u fakakaukau ni.

‘Uluakii, ko e fo’i lea ko e matu’uaki (resilient) ‘i he mala’e ‘o e langa fakalakalaka ‘o ha fonua (development) ‘oku te’eki ‘i ai hano ‘uhinga pau (agreed definition), a’u pē ki he ngaahi va’a ngaue ‘a e UN, pea ‘e faingata’a ke fuatautau (measure) fakalelei’i ‘a e ngaahi taumu’a ngaue mo honau olá.        Neongo ‘ení, ‘oku ‘i ai ‘a e ngaahi ‘elemeniti ‘o e matu’uakí hangee ko e matatali (withstand), fakafoki (recover), mo e liliu ki hoto ‘atakaí (adaptation).

Ko hono fakalea ‘e tahá, ‘e anga fēfē ‘a e tali (respond) ‘a e kominiutí ki he ngaahi ha’aha’a (stresses) ‘o e mamanii, tatau pē ngaahi fakatamaki fakaenatula pe fa’u ‘e he tangatá, hangē ko e tō lalo ‘a e ‘ekonomika ‘o mamaní (financial crisis) mo e fefiliuaki ‘a e ‘eá. Koe taumu’a ni ‘oku fiema’u ‘a e pa’anga lahi ‘i he tokoni mei muli (aid-donors) mo e ngaue malohi mo lelei ‘a e sosaieti koiá.

Ko e konga ‘e taha ‘o e kaveinga ni ko e matu’uaki ‘a e ‘eá (climate resilience), pea ‘oku ‘uhinga ia ki hotau ivi (capacity) faka-sosiale/‘ekolosiale kene malava ‘o matatali ‘a e ngaahi ha’aha’a ‘o e feliliuaki ‘o e ‘eá, pea malava foki ‘o fai ha fokotu’utu’u fo’ou ke tu’uloa ‘a e sisitemii ke mateuteu lelei ki ha ngaahi nunu’a kovi ‘o e feliliuaki ‘a e ‘eá.

‘Oku fai foki ‘a e tokangaa ia ke fakalelei’i ‘a e ngaahi vaivai’anga (vulnerabilities) ‘o e ngaahi komiunití mo e fonuá ‘a ia ‘oku kau ai ‘a e ngaahi fokotu’utu’u (strategies) fakasosiale, ‘ekonomika, tekinikale, politikale ‘i he levolo kotoa ‘o e sosaietí. Neongo ‘ení, koe ngaahi fakakaukau pē (theories) ‘a ia ‘oku toe ‘eni ‘a hono fakahokó.

‘Oku ‘i ai ‘a e hoha’a lahi ‘i he ngaahi liliu ‘e malava ke hoko fakasosiale ki he sosaieti Tongá, tautautefito ki he fika 12-20 ‘o e fakamatala’i ‘o e palanii ‘i Fepuelii, koe’uhí na’a ‘ikai fai ha talanga’i lahi mo lelei ‘e he kakaí kae toki fakahoko, he ’e uesia ai ‘a ‘eenau mo’uí ta’etenau ‘ilo ki ai mo loto foki ki ai.

Tau manatu’i ko e ngaahi fiema’u lahitaha ‘a e palaní ko e ngaahi fakakaukau tefito fakauesite, pea ‘oku ngaue’aki ‘e he UNFCC ‘a e ngaahi kautaha fakamaketi leleitaha ‘i mamaní ke teke‘aki ‘a ‘enau ngaahi kaveingá pea ko e me’a pē tenau talamaii, ‘oku ‘ikai fa’a fiema’u ia ke toe fai ha lea atu ka tau tau’olunga kitautolu ki he ‘enau fasí, tatau pe ‘oku tau sai’ia ai pē ‘ikai.

Ko e ngaahi founga fakasitetisitika ‘oku fai‘aki ‘a e fokotu’utu’u ‘o e palaní, hangē ko e ‘projections’ pe ‘predictions’ ‘o hangē ‘oku lele laine hangatonu (linear) ‘a natulá, ka ‘oku fihi (chaotic) pea taimi lahi ‘oku ‘ikai tonu ‘a e ngaahi fiká, ka ‘oku tau fa’a laukau’aki hotau potó ‘o toki fakatonutonu kitautolu ‘e natula.

‘Oku totonu foki ketau vakai’i fakalelei ‘a e ngaahi fokotu’utu’u ‘e fakahoko‘akí he ‘oku lahi, pea ‘oku fiema’u ‘a e silini lahi mo e kau fale’i (consultants) tokolahi mei muli, he ka tau lele atu pē ‘oku ‘ikai ha silini, ko e tu’u ia ‘a e palaní pea ‘e moho vaeua ‘a ‘etau me’a kotoa, ‘a ia ‘e malava ‘o uesia kovi ai ‘a ‘etau me’a kotoa pē.

Uá, ‘i he kamata ‘o e ta’u kuo’osí na’e tukuange mai ‘a e ‘press release’ ‘a e Pule Lahi (Executive Secretary) ‘o e UNFCC, Ms Christiana Figueres, ‘o pehē ai ko e taumu’a (aim) ‘o e UNFCC ia ‘oku ‘ikai ko e fakahaofi (save) ‘a mamani mei he maumaulahi faka’ekolosia (ecological calamity) ka ko hono faka’auha (destroy) ‘a e sisitemi ‘capitalism’. Toe pehē foki ‘e Ottmar Edenhofer, ko e taki ‘i he ‘IPCC’ (Intergovernmental Panel on Climate Change), ‘i hano faka’eke’eke – “‘oku ou fie fakamahino’i heni ‘oku mau tufotufa ‘a e koloa (wealth) ‘o mamaní ‘aki ‘a e polisí ki he ‘eá (climate policy), pea ke mahino ‘oku ‘ikai ke toe ‘environmental policy’ ‘eni ia”.

Ko ia ai, ‘oku fai ‘a e tapou ke ‘ai pe mo tau toe siosio holo na’a tau fu’u femo’uekina ‘i he ‘ete ‘i he palaní, ‘o ‘ikai ketau fakatokanga’i ‘oku ‘i ai ha fu’u pelepela (‘a e fakamatala ‘a e kau takí ‘i ‘olungá) ‘i mu’a, ‘o tau hekea ai pea tau toki fakatomala mo tau fetukuaki ai pe kohai ‘oku koví.

(9)

Facebook Comments