“Ko e hā nai ‘uhinga lelei mo totonu ‘ikai tali e tokoni helikopetá?”

Helikopeta na’e ‘ikai tali

Helikopeta na’e ‘ikai tali

Na’e pehē ‘e he Palēmia ‘o Ha’amoá, Hon. Tuilaepa Sailele Malielegaoi ‘oku fu’u mātu’aki ta’e’uhinga mo laulaunoa ki ha fa’ahinga pule’anga kene fakasītu’a’i ha fa’ahinga tokoni ke langa hake ‘aki e fonuá.

Ko e me’a ‘eni ‘a Tuilaepa hili ia ‘a ‘ene tali fiefia ‘a e tokoni helikopeta ‘a e tangata pailate mo pisinisi ‘Aositelēlia ko Rodger McCutcheon, ‘a ia na’e ‘ikai ke tali ‘e Tongá ní.

Na’e ha’u ‘a e tangata ko ‘eni ki Tonga ni ke ‘oatu ‘ene sevesi ma’ae fonua, pea ke foaki ‘a e helikopeta ke kau he tokoni ki he taimi ‘oku fiema’u fakavavevave ai ki he ngaahi feitu’u ‘oku ‘ikai lava ha puna ki ai ‘a e vakapuna.

‘Oku fa’a hoko ‘a e fiema’u ni ‘i he taimi ‘oku hoko ai ha fakatamaki, pea fiema’u fakavavevave ‘a e ‘ave ha taha ke faito’o, mo e ngaahi me’a pehe. Kae fuloa fau ‘a e ‘ikai fai ha ngaue ki ai ‘a e tafa’aki fepuna’aki ‘a Tonga, ke lesisita pea ‘oange ha ngofua ke fepuna’aki ‘i Tonga ni, ka na’e ‘ikai ke lava eni.

Ko hono fakafe’ātungia’i holo ‘e he Potungāue Sivile ‘a e Pule’angá hoko mo hono ‘ikai ke tali ke fefolau’aki ‘i Tonga ni ‘a e helikopetá, ne hiki ai ‘e Rodger McCutcheon ‘a ‘ene tokoní ‘o ‘ave ki he Pule’anga Samoá. Pea tali lelei ia ‘e Samoa.

Ko e helikopeta ko ‘ení na’e fakataumu’a mai ke fakahoko fatongia ‘i hono tokoni’i fakavavevave ‘o ha taha tautefito ‘i he tafa’aki faka-faito’ó mo e ngaahi taumu’a kehe pē ‘oku ‘aonga ki he fonuá. Na’e pehē ai ‘e McCutcheon kuo ne vēkeveke ia ke ‘ave ‘a ‘ene tokoni ko ‘ení ki he Pule’anga Samoá hili ia hono tau toloi ‘e he pule’anga Tongá ‘a hono fakalele ‘o e helikopeta ko ‘ení.

‘I he’ene peheé, na’a ne fakahā ai ‘a e ‘uhinga na’e tuku ange mei he Potungāue Fefononga’aki Sivile ‘a e Pule’angá ‘oku ‘ikai ke tali ai ‘a e helikopetá ke folau holo ‘i Tongá.

Ko e taha ‘o e ngaahi ‘uhingá, pehē ‘oku ma’olunga ange ‘a e tu’unga malu ‘o e fepuna’aki sivile ‘a Tongá he ngaahi makatu’unga na’e lava mai mo McCutcheon mei ‘Aositelēliá. ‘I he’ene peheé, na’e tuku ange ai ‘a e taimi ko e māhina ‘e 3 ki he 4 kene tatali ai ki hono fakakaukau’i ‘a e ngaahi makatu’unga ke lava ai ‘o fefolau’aki ‘a e helikopeta ko ‘ení ‘i Tongá ni.

Kā, na’e a’u ai ki ha taimi mo hono faka’ikai’i ‘a ‘ene tokoní ‘o hiki ai ia ki Samoa.

Hili hono ‘oatu ‘e McCutcheon ‘a ‘ene tokoní ki Samoá, na’e talitali lelei ai ‘e he Palēmia ‘o e fonuá, Hon. Malielegaoi mo ‘ene fakamālō’ia ‘o pehē ‘oku kau ‘eni ‘i he tokoni lahi ki he tafa’aki faka-faito’o ‘a e fonuá, fakatotoló mo e fekumí kae pehē foki ki he fakahaofi mo’uí.

Na’a ne hoko atu ai ‘o pehē, ka a’u leva ki ha tu’unga ‘oku ‘i ai ha ‘inivesi taautaha ‘a ha tokotaha ka ‘oku kaunga tonu mo e mo’ui ‘a e kakai ‘o e fonuá, pea ‘oku fiema’u leva ke fai ‘e he Pule’angá ‘a ‘enau tu’utu’uni fakapotopoto tahá.

“‘Ikai ngata aí, ka ‘oku fu’u launoa ‘aupito mo mātu’aki ta’e’uhinga ‘aupito ki ha fa’ahinga Pule’anga kene fakasītu’a’i ha fa’ahinga tokoni natula pehe ni,” ko Tuilaepa ia.

Na’a ne fakahā aipē ‘ene poupou kakato kia McCutcheon ‘i he ngāue lelei ‘oku ne fakahokó ‘aki ‘ene fakangofua ke fakahoko fatongia kakato ‘i Samoa.

Na’e fakahā heni ‘e he ‘Ōfisa Fale’i Mā’olunga ‘i he Va’a Fefoalu’aki Sivile ‘a Samoá ‘o pehē, ‘oku ‘osi a’usia ‘e he tu’unga ia ‘oku ‘i ai ‘a e lēkooti ‘o e tu’unga malu ‘o e pailate ‘a McCutcheon ki he tu’unga mā’olunga ‘aupito ‘a ia ‘oku fenāpasi mo e ngaahi makatu’unga mei he Potungāue Sivile ‘a Samoá.

‘I he’ene peheé ‘oku fiefia ai ‘a e Pule’angá ke ‘omai ‘a e tu’unga malu mo falala’anga ‘a McCutcheon ‘i he fefolau’aki helikopetá ke tokonia ‘a honau tafa’aki fefononga’akí, takimamatá mo e malu ‘a e kakaí.

Kaekehe, ‘oku natula tatau ‘eni mo hono toutou fakaanga’i ‘e he Pule’angá ‘a e vakapuna Siaina ko e MA60 ‘o tukuaki’i ki he fu’u ma’ulalo ‘aupito ‘a e tu’unga malu mo e hao ‘o e vaká ke fefolau’aki ‘i Tongá. ‘I he’ene peheé, na’e toe fai ai ‘a hono fakamālohia ‘o e Lao Fepuna’aki Sivile ‘o e 2014 ‘a Tongá ki ha tu’unga totonu pea ke fenāpasi mo e Ngaahi Tu’utu’uni Fepuna’aki Sivile ‘a Nu’usilá.

Ka, kuo mole heni e faingamalie ‘a Tonga ni ki he vakapuna MA60 mei Siaina, pea toe a’u mai ki he helikopeta ko ‘eni mei ‘Aositelelia, kuo ‘ikai p eke lava ke tali ‘e Tonga.

(24)

Facebook Comments